Nino Costa/L'ex cesa dël Balon

L'ex cesa dël Balon

Sota j'arcade fruste e dëspojà,
al pòst dl'incens e dël profum dle fior,
j'é na spussa 'd verdura ambaronà,
n'odor d'arciuf, ëd mofa e 'd caulifior.

Cavagne daspërtut - dë dsà ...dë dlà -
contra le pilie e su l'autar magior...
Oh mè pòr San Simon dël vej mërcà,
't ses diventà 'n croton për j'artajor.

Na vòlta, ai temp dj'Apòstoli e dij Sant,
Nosgnor con sò cordon da pelegrin
l'ha parà via da 'n cesa ij negossiant;

adess, ai temp dla radio e dj'aviator,
da 'nt la cesa ridota a magasin,
ij negossiant l'han parà via Nosgnor.

Nino Costa
(da "Fruta madura", 1931)