Nino Costa/L'era na sèira 'd magg
L'Angelica
modifichéL’era na seira ’d magg. Chiel a finïa,
per l’editôr, në studi ch’a pressava.
Chila, setà davsin ’dla scrivanïa,
ciutô, ciutô, tranquila a ricamava.
J’erô spôs da ’n bel pò: Gnente ai mancava
né ’l travai, né ’l guadagn, né l’alegria,
ma ’n t’so cheur ognidun a rigretava
d’esse ’nc ôra... parei: sensa famïa.
Da la fnestra duverta a jë vnisïa
n’aria dôssa e vlutà. Chiel a l’è aôssasse
e Chila ’d co... La fiama ch’a cimïa
l’ha torna ciapà feu... E a poch a poch
le doe bôche davsiñe a sôn basasse
... e dop neuv meis l’han butà fora ’l fioch.