Nino Costa/Invidia

Artorn

---

Invìdia

Un bicc^[1] con soa blos macià 'd caussin-a
mentre ch'a pòrta ij mon drinta 'n carèt
a canta con la vos polida e s-clin-a
"Maijin la rossa a l'ha perdù 'l gigèt...".

Në student - (un biondin con l'ària fin-a)
ai passa aranda, lest come 'n folèt:
- la cartela quatà da la mantlin-a,
le cifre dël Ginasio an sël bonèt.

Ël bicc lo guarda e a pianta lì 'd canté...
Quaicòsa 'd brut, ëd tërbol e d'afros
a-j luz ant j'euj... lë sgnor e l'ovrijé.

"Përchè mi la cassòla e ti la piuma?
përché ti la mantlin-a e mi la blos?"
...L'onda dla vita, 'ntorn a lor, a s-ciuma...

Nòta

1. bicc, cit garson dij murador