Neuv sermon subalpin/Nosgnor! Fame na vìsita
Nosgnor! Fame na vìsita!
modifiché- "Nosgnor! Arcòrd-te 'd mi cand ch'it mostre toa binvolensa a tò pòpol! Fame vìsita con toa salvassion" (Salm 106:4).
Com é-lo ch’as peul porté na përson-a a vorèj esse “visità” da la salvassion ëd Nosgnor? Com é-lo ch’as peul mostreje a vorèjlo? E bin, a l’ha da savèj prima cheicòsa ‘d soa condission ëd condan-a. La grassia dla salvassion a riguarda mach coj ch’a son condanà. “Përchè ‘l Fieul ëd l’òm a l’é vnùit a serché e a salvé lòn ch’a l’era përdusse” (Luca 19:10). A l’é për lòn che la salvassion a riguarda mach coj ch’a san d’esse përdù. Na përson-a a dev esse përdùa, a l’ha da sent-se dël tut përdùa anans ëd podèj apressié la salvassion ëd Dé. E com é-lo ch’a l’é përdusse? Cand ch’a l’ha përdù minca na speransa che soe pràtiche religiose a-j servo. Cand ch’a l’ha përdù ‘l sentiment d’esse “a pòst” dë ’dnans a Dé përchè ch’a l’é mach n’ilusion. Cand ch’a l’ha përdù ël sens d’esse fòrta - a l’é nen. Cand ch’a l’ha përdù tota soa fiusa an lòn che ‘l mond a podrìa deje - a l’é ‘d gnun-a sostansa. Cand ch’a l’ha përdù tut lòn ch’a l’é ‘d soa natura carnal. Vera, përdù, përché ‘d tut sossì Dé a l’ha dëspojala. Na përson-a ch’a l’é portà a cost ëstat ëd miseria e bancarota compléta - d’esse nen, d’avèj nen, ëd savèj pì nen - cola-lì a l’é la përson-a che a mesaneuit a vija, ant soe ore solitarie, dacant al feu e, a vire, scasi dì e neuit, a piora, gëmm, implora, ciama e prega për la manifestassion ëd la salvassion ëd Dé a soa ànima. “Ven a fame vìsita, it në prego, con toa salvassion”. Na përson-a parèj a l’ha da manca ‘d na vìsita ‘d Nosgnor; a l’ha da manca che Dé a ven-a, ch’a pija soa residensa an sò cheur; ch’as fà vëdde da chila, ch’as manifesta e arvela a chila, ch’a mangia con chila, ch’a marcia con chila, ch’a staga an chila coma sò Dé. N’ànima ch’a viv a peul contentesse ‘d nen da meno che lolì. A l’ha da arsèive na vìsita da part ëd Dé. A fà nen bon pro ‘d lese ant la Paròla lòn che Dé a l’ha fàit an favor dij sò sant, dij sò sërnù, ant ij temp passà. A l’ha da manca ‘d cheicòsa pròpi për chila, ch’a-j fasa dël bin, ch’a l’arlegra, ch’a-j daga d’arlass, ëd consolassion, ch’a la benedissa e ch’a-j daga ‘d profit, ch’a-j gava ij fardej ch’a l’ha an sla schin-a e ch’a stabilissa la pas an soa ànima. A l’ha donca da manca ‘d na visitassion - che la presensa, la potensa, la misericòrdia e l’amor ëd Dé a fasa na vìsita a soa ànima.
Da "Porzioni giornaliere" [Selezione dagli scritti di J. C. Philpot (1802 – 1869)] https://www.tempodiriforma.it/mw/index.php?title=Preghiera/Porzioni_giornaliere