La Bibia piemontèisa/Testament Vej/Surtia/Surtia 37

←Surtia 36

La Bibia piemontèisa Surtìa (Èsod)

Surtìa 38→

Surtìa

La Bìbia piemontèisa - Surtìa 37

37

L’Èrca

¹Bessalel a l’ha fàit l’Èrca ‘d bòsch ëd gasìa, ëd sinch branche ‘d larghëssa për tre ‘d longhëssa, e tre d’autëssa. ²A l’ha arvëstìla d’òr pur da drinta e da fòra, e a l’ha faje na garlanda d’òr tut dantorn. ³A l’ha fàit fonde quatr anèj d’òr e a l’ha fissaje ai quat canton ëd sota, doi anèj da ‘n fianch e doi da l’àutra. ⁴Peui a l’ha fàit dë stanghe ‘d bòsch ëd gasìa e a l’ha arvëstìje d’òr, ⁵e a l’ha faje passé për drinta a j’anèj dij fianch dl’Èrca për podèjla trasporté. ⁶A l’ha faje ‘dcò ‘n Coèrcc dël Përdon d’òr pur, ëd sinch branche ‘d larghëssa për tre ‘d longhëssa. ⁷A l’ha fàit ëdcò doi cherubin sislà d’òr e a l’ha butaje un a minca stremità dël Coèrcc dël Përdon. ⁸Minca ‘n cherubin a vardava da na stremità dël Coèrcc dël Përdon. ⁹Ij cherubin a stasìo l’un an fàcia ëd l’àutr, che a vardavo ‘l Coèrcc dël Përdon; a lo guernavo con le doi ale dëstendùe.

La tàula dij pan dl’oferta

¹⁰Peui Bessalel a l’ha fàit ëdcò na tàula ëd bòsch ëd gasìa. Soa longhëssa a l’era ‘d quatr branche, soa larghëssa ‘d doe branche, e soa autëssa ‘d tre branche. ¹¹A l’ha arvestila d’òr pur e a l’ha faje na garlanda d’òr tut dantorn. ¹²A la tàula, tut dantorn, a l’ha faje na curnis ëd quatr dil con na garlanda d’òr. ¹³A l’ha fàit fonde quatr anèj d’òr e a l’ha fissaje ai quatr canton ai quatr pé dla tàula. ¹⁴A tocavo ‘l bòrd ëd dzora, për feje passé le stanghe e parèj trasporté la tàula. ¹⁵Le stanghe ch’a l’ha fàit a j’ero ‘dcò ‘d bòsch ëd gasìa e a l’ha arvëstìe d’òr; a sërvìo për trasporté la tàula. ¹⁶Ëd pì, a l’ha fàit d’òr pur j’asi da buté an sla tàula: ij sò piat, soe tasse, e ij sò càles për le libassion ëd vin.

Ël Grand Candlé d’òr

¹⁷Bessalel a l’ha ‘dcò fàit ël Grand Candlé d’òr pur sislà, A l’ha fàit ël Grand Candlé antrega e soa decorassion d’un sol tòch: ij sò pé, ël bion, ij càles, ij but e le fior . ¹⁸Dal fust sentral a surtìo ses brass: tre brass da na banda e tre da l’àutra. ¹⁹ Minca ‘n brass a l’avìa tre pom a forma d’amàndola, con ij càles e le fior. A j’ero parèj ij ses brass ch’a surtìo dal bion ëd ël Grand Candlé. ²⁰Ël bion ëd ël Grand Candlé a l’avìa quatr pom a forma d’amàndola, con ij sò càles e soe fior. ²¹A j’era n’arbut d’amàndola sota minca un paira ‘d brass andova ij ses brass as ëstendìo dal bion sentral, tut fàit d’un sol tòch. ²²Sti pom e sti brass a formavo ‘n sol tòch con la ël Grand Candlé, e tut a l’era sislà con d’òr pur. ²³A l’ha ‘dcò fàit soe set lampie con ij sò mochèt e pòrta-mochet d’òr pur. ²⁴Për ël Grand Candlé con tùit ij sò asi, a l‘ha dovrà tranta chilo d’òr pur.

L’autar dl’ancens

²⁵L’autar për smon-e d’ancens a l’ha falo ‘d bòsch ëd gasìa e quadrà: doe branche ‘d larghëssa, doe ‘d longhëssa e quatr d’autëssa. Ij còrn dij quatr canton ëd dzora a j’ero tut d’un tòch con l’autar. ²⁶A l’ha arvëstilo d’òr pur: ël dëdzora, ij sò fianch dantorn, ij sò còrn; e a l’ha faje na garlanda tut d’antorn. ²⁷An doi dij fianch dl’autar, sota la bordura, a l’ha fissaje doi anèj d’òr anté ch’a l’avìo da passeje le stanghe për trasportelo. ²⁸A l’ha faje dë stanghe ‘d bòsch ëd gasìa e a l’ha arvëstìje d’òr.

²⁹A l’ha ‘dcò fàit l’euli për l’unsion sacra e l’ancens aromàtich pur, pròpi coma ch’a lo fan ij përfumé^[1].

Nòte

1. Cfr. Surtìa 30:22-38.