La Bibia piemontèisa/Testament Vej/Surtia/Surtia 28

←Surtia 27

La Bibia piemontèisa Surtìa (Èsod)

Surtìa 29→

Surtìa

28

La Bìbia piemontèisa - Surtìa 28

Vestimente dij sacerdòt

¹Da ‘n tra j’Israelita, fà vnì press a ti tò frel Aron e ij sò fieuj Nadab, Abiu, Eleasar e Itamar, për feje dventé ij mè sacerdòt.

²Fà confessioné për tò frel Aron ëd vestimente sacrà përchè ch’as presento con glòria e majestà. ³Parl-ne a tute le përson-e le pì vajante che mi i l’hai fornì ‘d finëssa^[1] e bon gust përchè ch’a confession-o le vestimente ch’a porterà Aron cand ch’a sarà consacrà për esse ‘l mè sacerdòt. ⁴Le vestimenta a saran: na petorin-a^[2], n’éfod^[3], na mantlin-a, na tùnica^[4] damascà, un turbant^[5] e na s-cirpa. Ch’a faso, donca, coste vestimente sacrà përchè as jë buto adòss tò frel Aron e ij sò fieuj cand ch’a fan la funsion com ij mè sacerdòt. ⁵Për feje, j’arté a l’avran da dovré d’òr, ëd porpra viòla e rossa, d’ëscarlat e damasch.

L’Éfod⁶L’éfod a l’han da felo con òr, porpra viòla, porpra rossa, ëscarlat e damasch antorzù, soasì con art. ⁷A l’ha da avèj doi spalin-e tacà da le doe part për fissèjlo adòss. ⁸La s-cirpa decorativa a sarà fàita dj’istess materiaj: lin tessù ‘d manera fin-a, brodà con d'òr e con fil color bleu, porpra e scarlata.

⁹Pija doi pere d’ónis e faje gravé dzora ij nòm dle tribù d’Israel, ¹⁰ses nòm an sla prima pera e j’àutri ses nòm an sla sconda, për órdin ëd nassensa dij fieuj ëd Giacòb. ¹¹Ij nòm a l’han da esse gravà dl’istessa manera che j’oréfiss a gravo le pere pressiose. Apress, fà ancassié le doi pere con ëd montadure d’òr. ¹²It l’has da buté le doi pere an sle spalin-e dl’éfod coma ‘n memorial ëd le dódes tribù d’Israel. Parèj, cora che Aron as presenterà dë 'dnans a Nosgnor, chiel a porterà an sle spale ij nòm ëd le tribù përchè Nosgnor a ten-a present sò pòpol. ¹³Le doi montadure a saran d’òr. ¹⁴Peui antërsa doi chen-e d’òr pur an forma ‘d cordon e tàchie a la filagran-a dle montadure an sle spalin-e dl’éfod.

La Petorin-a dël Giudissi

¹⁵Fà confessioné la “Petorin-a dël Giudissi”^[6], travajà ‘d manera soasìa, l’istess che l’efod, valadì con d'òr, porpra viòla, porpra rossa, ëscarlat e damasch artorzù. ¹⁶La petorin-a a l’ha da avèj na forma quadrà ‘d na branca 'd longhëssa për n'àutra 'd largheur^[7]. ¹⁷A l’avrà da esse decorà con quatr file ‘d pere pressiose: an la prima fila na corniòla, un topass e në smerald; ¹⁸an sla sconda: na turchin-a, un safir e un beril. ¹⁹An sla tersa: un giassint, n'àgata e n'ametista. ²⁰An sla quarta: un crisolit, n'óniss e un diaspr. Minca pera a l’ha da esse ancassià ant na montadura d’òr. ²¹An total a saran dódes pere coma ch’a son dódes le tribù d’Israel. Minca na pera a porterà ‘l nòm d’un-a dle dódes tribù, gravà coma ch’ij bisotié a fan con ij cacet. ²²Fà për la petorin-a dle filagran-e d’òr pur tressà an forma ‘d cordon. ²³Fà ‘dcò doi anej d’òr e butje a le doi stremità dë dzora dla petorin-a. ²⁴Passa ij doi cordon d’òr për ij doi anej. ²⁵Fissa ij cap dij doi cordon a le montadure an slë dnans ëd le spaline dl’éfod. ²⁶Fà ancora doi anej d’òr e bùtie a le doi stremità dla part interna dla petorin-a, cola ch’a toca l’éfod. ²⁷Fane doi ëd pì e fìssie a le doe spalin-e dl’éfod, sota an sël dnans, tocand soa giontura, dzora dla s-cirpa dl’éfod. ²⁸Ch’a gropo j’anej dla petorin-a a j’anej dl’éfod con un cordon ëd porpra viòla, ëd manera che la petorin-a a peuda sté dzora dla s-cirpa dl’éfod e a peuda nen dëstachéssie.

²⁹A l’é parèj che quand Aron a intrerà ant ël Santuari, a porterà an sël pét ij nòm dle tribù d’Israel gravà an sla Petorin-a dël Giudissi, përchè Nosgnor a ten-a sèmper present sò pòpol. ³⁰Drinta a la Petorin-a dël Giudissi butje j’Urim e Tumim përchè Aron a-j pòrta sèmper an sël pét quand ch’as presenta dë 'dnans ëd Nosgnor. A l’é parèj che chiel a porterà sèmper dë 'dnans a Nosgnor le decision^[8] dj’Israelita^[9].

La mantlin-a

³¹La mantlin-a ch’a l’ha da sté dzora dl’éfod fala tuta ‘d violet. ³²Al mes a l’avrà na dovertura për feje passé la testa, con l’orlo tut an broa e tëssù tanme l’arfial ëd na corassa, përchè a vada nen a s-cianchesse. ³³Tut dantorn a l’orlura ‘d sota dël mantel a saran fàit ëd pom granà ‘d porpra rossa, viòla e d’ëscarlat; ³⁴a-i saran ëd sonaje d’òr an tra un pom granà e l’àutr a l’orlura dël mantel. ³⁵Aron as lo butrà adòss quand ch’a l’àbia da ufissié. Parèj, quand ch’a intrerà ant ël Santuari a la presensa ‘d Nosgnor e quand ch’a na seurt, as sentirà ‘l son dle sonaje, përchè chiel a meuira pa.

Marca dla consacrassion

³⁶Fà na làmina d’òr pur e gravje, coma ch’a fan j’oréfiss con ij cacèt, coste paròle: “Sacrà a Nosgnor”. ³⁷Fiss-la con un cordon ëd porpra viòla al dë 'dnans dël turban^[10]. ³⁸A starà an sla front d'Aron, e parèj Nosgnor a tnirà nen cont ëd le colpe ch’a në podran ancore j’Israelita quand ch’a smon-o soe oferte sacrà ‘d lor. Aron a porterà sèmper cola làmina dzora dla front, përchè Nosgnor a l’abia sèmper piasì ëd cole oferte.

³⁹La tùnica a sarà 'd lin brodà e'l turban e la s-cirpa a saran ëd damasch archincà.

D’àutre vestimente

⁴⁰Për ij fieuj d’Aron, fà confessioné ‘dcò ‘d tùniche, ‘d sinture e ‘d barëtte^[11], përchè ch’as presento con glòria e majestà. ⁴¹Con tut sòn a saran vestì tò frel Aron e ij sò fieuj. Ónzje peuj con d’euli, daje l’anvestiura e che parèj a sio considerà ‘d gent a part, sacrà, për podej ufissié coma ij mè sacerdòt. ⁴²Faje ‘dcò ‘d braje ‘d lin da portesse sota, për quaté soa nudità ‘d lor; a l’avran da quatesse dai ren a le cheusse. ⁴³Aron e ij sò fieuj a l’avran da vestisse parèj quand ch’a l’àbio da intré ant la Tenda dël Rëscontr e cand ch’as avzineran a l’autar për ufissié ant ël Santuari. A l’é parèj che lor a ancoreran an gnun-e colpe e a meuireran pa.

Nòte

1. O “spirit ëd saviëssa”.
2. O “taschëtta sacrà חֹשֶׁן  [hoshen].
3. Cost tèrmin a l’é da conservesse an ebraich përchè gnun a sà ‘d sicur lòn ch’a fussa, a peul desse na camisòla.
4. תָּשְׁבֵּץ (tashbets).
5. מצנפת (mitsnepheth).
6. חֹשֶׁן מִשְׁפָּט, khoshen mishpat, o “petorin-a për pijé ‘d decision”.
7. O “vintesinch centim”.
8. O “ël giudissi” מִשְׁפָּט (mishpat).
9. Cfr. Numer 27:21; Esdra 2:63; Neemia 7:65.
10. קדש ליהוה.
11. O “mìtria”.