La Bibia piemontèisa/Testament Vej/Surtia/Surtia 26

←Surtia 25

La Bibia piemontèisa Surtìa (Èsod)

Surtìa 27→

Surtìa

26

La Bìbia piemontèisa - Surtìa 26

La strutura dël Tabërnàcol

Strutura dël Tabërnàcol

¹Për lòn ch’a riguarda ël Tabërnàcol, it lo faras con des taj ëd tèila fin-a ëd damasch. A l’avran d’avèj na tinta porpra rossa e scarlata, decorà con figure ‘d cherubin brodà ‘d manera artìstica. ²Tùit ij taj ëd tèila a l’han da esse dl’istessa mzura: quatòrdes méter ëd longhëssa për doi ‘d larghëssa. ³Gionta 'nsema sinch ëd coste tende, e fà l’istess con j’àutre sinch. ⁴Peui fà dj’àsole ‘d color viòla an sël bòrd ëd la tenda ‘d fòra dla prima série; fà l’istess al bòrd ëd la tenda ‘d fòra dla sconda série. ⁵Fà sinquanta àsole an sla prima tenda e sinquanta àsole an sël bòrd ëd la tenda ‘d fòra dla sconda série ‘d tende; j’à(n)sole a saran an corispondensa j’un-e con j’àutre. ⁶Fà ‘dcò sinquanta bócle d’òr e gionta ij tèil l’un a l’àutr pr’ ël mojen ëd le bócle parèj che ‘l Tabërnàcol a forma un tut ùnich.

⁷Antërsa 'ncora óndes tèil ëd pel ëd crava për fé na tenda ch’a staga dzora dël Tabërnàcol. ⁸J’óndes tèil a l’han da avèj l’istessa mzura: quindes méter ëd larghëssa për doi ‘d larghëssa. ⁹Gionta 'nsema sinch tèil an tra ‘d lor, e d’àutri ses an tra ‘d lor. It dobieras andaré ‘l sest tèil ësversàndlo an sla part an facia dla tenda. ¹⁰Fà sinquanta àsole an sla bordura dël tèil ëd fòra dla prima série e sinquanta àsole an sla bordura dël tèil ëd fòra dla sconda série ‘d tèil. ¹¹Fà ‘dcò sinquanta bócole d’aram e it faras intré le bócle ant j’àsole. It giontras parèj la tenda ‘d manera ch’a forma ‘n tut ùnich. ¹²Ore, la part ch’a resta dij tèil ëd la tenda, ël mes tèil ch’a resta, a pendrà darera dël Tabërnàcol, ¹³e 'd la part dë dzora dla tenda, as në spartirà mes méter për mincadun dij fianch dël Tabërnàcol. A resterà parèj dël tut quatà. ¹⁴Për la tenda, peui, it l’has da fé na covertura ‘d pèil ëd moton tensùe ‘d ross e dëdzora 'ncora na covertura ‘d pèil ëd vitel ëd mar^[1].

La boscamenta

¹⁵Le plance ‘d bòsch për sostnì ‘l Tabërnàcol, da butesse drite, fàje ‘d bòsch ëd gasìa. ¹⁶Minca na plancia a l’ha da esse longa vint branche e larga tre, ¹⁷con doi morion gionzù un a l’àutr da ‘n rinfòrs. Tute le plance dël Tabërnàcol a l’avran da esse dj’istesse mzure. ¹⁸Fane vint për la banda vers ël mesdì, a sud. ¹⁹Fà ‘dcò quaranta sòcoj d’argent sota le vint plance, doi pé sota minca n’ass, për ij sò doi sòcoj d’argent, e doe basi sota l’àutra plancia për ij sò sostegn. ²⁰Për lë scond fianch dël Tabërnàcol, anvers tramontan-a, fà ‘dcò d’àutre vint plance. ²¹Con quaranta sòcoj d’argent sota i vint ass, doi për minca n’ass. ²²Për la part darera dël Tabërnàcol, anvers ponent, faje ses plance. ²³e doi an pì për ij sò doi canton ch’a son daré. ²⁴Le plance a saran assemblà con doi tòch istess cobià e giontà ‘d pianta da sota fin-a dzora, a l’autëssa dël prim anel. A l’ha da fesse parèj 'dcò con ij doi ass dij doi canton. ²⁵An total, a-i saran eut plance con ij sò sòcoj, l’é a dì, doi sòcoj per minca na plancia.

²⁶Fà ‘dcò ‘d traverse ‘d bòsch ëd gasìa: sinch për le plance d’un fianch dël Tabërnàcol, ²⁷sinch për le plance dl’àutra banda dël Tabernàcol, e sinch ëd pì për le plance ‘d la part darera, anvers ponent. ²⁸La traversa ‘d mes, a metà autëssa dj’ass, a l’ha da dëstraverseje da na banda a l’àutra. ²⁹Le plance e le traverse a l’han da esse tute laminà d’òr, e ‘dcò d’òr a saran ij sò anej, ch’a serviran për anfileie le traverse, e ‘dco cole-lì a l’han da esse arvëstìe d’òr. ³⁰Ël Tabërnàcol a l’ha da esse fabricà precis conform a la nòrma ch’i l’hai mostrate an sla montagna.

Ël Vel

³¹Fà ‘n Vel bin antorzù ‘d porpra violëtta, porpra rossa, ëscarlat e damasch decorà con figure ‘d cherubin brodà ‘d manera artìstica. ³²A l’avrà da esse pendù a quat colòne ‘d gasìa, laminà d’òr, con ëd rampin d’òr e ch’as pogio ansima a quat sòcoj d’argent. ³³Ël Vel a l’ha da esse pendù sota j’àsole e ambelelà, darera dël Vel, faje intré l’Èrca dla Testimoniansa. Ël Vel a l’avrà da separé ‘l Leu Sant da ‘l Leu Santissim^[2]. ³⁴Dzora dl’Èrca, ch’a conten lë Strument dl’Aleansa e ch’as treuva drinta ‘l Leu Santissim, a l’avrà da butesse ‘l Coèrcc dël Përdon. ³⁵La Tàula, a l’opòst, a l’ha da esse butà fòra dal Vel, an sla part a mesdì dël Tabërnàcol; nopà, la Tàula a sarà butà a tramontan-a. ³⁶Për l’intrada dla tenda, fàje n’àutr vel torzù ‘d porpra viòla e rossa. ëd porpra scarlata e damasch, travaj ëd brodeus. ³⁷Për ël Vel a l’é da fesse sinch colòne ‘d gasìa ch’a saran ëdcò patinà d’òr. So rampin a saran d’òr e sinch sòcoj d’aram a saran fondù.

Nòte

1. O “ëd delfin”. A l’é nen dël tut ciàir coma ch’as dovrìa volté ‘l tèrmin תחשים: se tasson, delfin, fòca, o vitel ëd mar.
2. O “ël sant dij sant”; cfr. At 7:44; Ebréo 8:5.