La Bibia piemontèisa/Testament Vej/Sofonia/Introdussion

Introdussion modifiché

Sofonìa a compiss soa mission ëd profeta ant ël regn ëd Giuda vers la fin dël sétim sécol durant ël regn ëd Iosìa (640-609) e, second vàire savant, anans ëd l'arforma religiosa che Iosìa a l'avrìa anandiasse a fé (cfr. 2 Rè 23:1-28). La situassion ëstòrica a l'é apopré la midema dël temp anté ch'a l'avìo predicà ij profeta Naum e Abacuch. L'imperi dl'Assìria a l'era scasi a la fin ëd sò domini e ch'a l'era rivà al cò con la croa 'd Gerusalem. D'àutra part, l'Egit a fasìa pression dal sud e a provava d'anfilesse an costi gieugh ëd podèj. Ël regn ëd Giuda a podìa nen resté fòra da costi aveniment, ch'a l'avìo n'influensa ancreusa 'dcò an sla tradission religiosa e soa situassion polìtica e sossial.

Ës lìber a armonta an sostansa a l'época 'd cost profeta, ma cost lìber l'é stàit sogetà a cite modìfiche e slargament an d'époche sucessive. Ël lìber as doverta con l'anunsi che Dé a l'ha pijà la decision ëd castijé Gerusalem e 'l regn ëd Giuda përché a l'han pëccà contra 'd chiel an vivend ant l'idolatrìa e la violensa (1:2-13). Cost giudissi as compirà ant ël Di dl'ira 'd Dé e a-i sarà na dëstrussion granda (1:14-18), ma coj ch'a ubidisso al Signor a podran seurti-ne san e salv (2:1-3). Ël giudissi e la dëstrussion a implicheran nen mach ël regn ëd Giuda, ma 'dcò le nassion ëvzin-e (2:4-15). Gerusalem e le përson-e pì 'd riguard a l'avìo ignorà Nosgnor: për lòn la sità a sarà frapà (3:1-8). Da la mòrt, contut, a seurtirà la vita: Nosgnor a trasformerà le nassion e lor a-j rendran ël cult ch'a jë speta. Nosgnor a formera con ij dzorvivù un pòpol neuv ch'a-j darà onor. A l'é antlora che Gerusalem e ij sò abitant a sauteran ëd gòj, përché 'l Signor a l'avrà manifestà sò amor (3:9-20).

A la gent ëd sò temp, ch'as ciamo se Dé ancora as interessa dla gent e se chiel a guida la stòria përdabon, Sofonìa a nunsia n'intervension divin-a ch'a trasformerà dël tut la situassion, con riguard particolar dij pòver e dj'umij (2:3; 3:12).

Schema modifiché

Ël di 'd Nognor - 1:2-2:3
Giudissi an sij pòpoj davzin a Israel e an sù Gerusalem - 2:4-3:8
Promësse 'd salvassion - 3:9-20