La Bibia piemontèisa/Testament Vej/Salm/Salm 99
Ij Salm modifiché
99. Nosgnor a regna! modifiché
- Ël poeta a ciama tuta la tèra a laudé Nosgnor perché chiel a 'rvela soa giustissia e a delivra Israel.
1Nosgnor a regna! Le nassion a tërmolo! Chiel a l'é stàsse dzora dij cherubin[1] e la tèra a l'é stàita socrolà. 2Nosgnor a l'é grand an Sion, a l'é dzora 'd tute le nassion. 3Che tute le nassion a làudo tò nom grand e maravijos! 4Ch'a làudo la fòrsa dël Rè ch'a l'ha cara la giustissia! Ti 't fortisse la dritura. Ti 't sicure an Giacòb la giustissia e l'equità. 5Laudé Nosgnor, nòstr Dé! Prostreve dë 'dnans ëd sò scagn! Chiel a l'é sant! 6Mosè e Aron a l'ero an tra ij sò sacerdòt! Samuel a l'era an tra 'd coj ch'a 'nvocavo sò Nom! A l'han pregà Nosgnor e chiel a l'ha scotaje. 7Chiel a-j parlava da na colòna 'd nìvole[2], lor a scotavo lòn ch'a-j comandava, le régole e j'istrussion ch'a-j dasìa. 8Nosgnor, nòstr Dé, ti 't l'has ëscotaje. A l'han trovà 'n ti un Dé ch'a përdon-a, ma 'dcò un ch'a castiga coj ch'a fan ëd pecà. 9Laudé Nosgnor, nòstr Dé! Réndje onor an sla montagna santa, përché Nosgnor, nòstr Dé a l'é Sant!
Nòte modifiché
- ↑ O "j'àngej alà". Cfr. Surtìa 25:22.
- ↑ Cfr. Surtìa 33:9.