La Bibia piemontèisa/Testament Vej/Salm/Salm 94

←Salm 93

La Bibia piemontèisa Ij Salm

Salm 95→

Ij Salm

94. Nosgnor! Dé dj'arvange!

La Bìbia piemontèisa - Salm 094

Ël salmista a ciama a Nosgnor an preghiera ch’a sio condanà ij malfator e a fortiss soa fiusa ant la giustissia ‘d Dé.

¹Nosgnor! Dé dle vendëtte! Ti ch’it ses ël Dé dj'arvange, arvela tò splendrior! ²Àuss-te, ti ch’it ses ël giùdes ëd la tèra, rend a j’arogant lòn ch’a mérito! ³Nosgnor! Fin-a a cand, fin-a a che mira ai pecador a-j sarà përmëttù d’arlegresse dël mal ch’a fan? ⁴A mnasso e a parlo con n’ària dë sfida; as vanto fin-a dle porcherìe ch’a fan. ⁵A sgnaco tò pòpol sota ij sò pé; a craso la nassion ch’at aparten. ⁶A masso le vidoe e ij forësté; a sassin-o j’orfanin. ⁷Lor a diso dcò: “Nosgnor a vëdd nen lòn ch’i foma; an efet, al Dé ‘d Giacob gnanca a j'antëressa!”.

⁸Pijé nòta ‘d lolì, vojàutri folitro. E voi, fabiòch, cand é-lo ch’i lo capireve? ⁹Coma ch’ i peule pensé che col ch’a l’ha fàit j’orije dla gent a podrìa pa sente? Coma i peule pensé che col ch’a l’ha creà j’euj a podrìa pa vëdde? ¹⁰Forse che col ch’a patela le nassion a podrìa nen castigheve? Chi ch’a l’é col ch’a mostra la siensa a j’òm? A l’é pròpi chiel! ¹¹Nosgnor a sà che ij pensé ‘d cola gent-lì a l’han gnun valor^[1]!

¹²Nosgnor! A l’han ëd boneur coj che ti ’t -j mostre lòn ch’a l’é giust, coj che da ti a ‘rsèivo la dotrin-a ‘d toa Lege. ¹³Mach lolì a peul pasié ij patiment dij temp d’aflission, fin-a al moment che ij pecador a saran anientà. ¹⁴Përchè Nosgnor ëd sicur a ‘rpossera pa sò pòpol; a bandonerà pa la nassion ch’a-j'aparten. ¹⁵La giustissia a prevalrà e chi ch’a fà lòn ch’a l’é giust e ch’a l’é onest a sarà vendicà.

¹⁶Chi é-lo ch’as ausserà për guerneme da ij malfasent? Chi ch’as butrà da mia part contra ij malfator? ¹⁷Se Nosgnor a l’avèissa pa giutame, i sarìa già da ‘n bel pò cogià ant ël silensi ‘d na tomba. ¹⁸Mi i crijava: “Ij mè pé a sghijo!”, ma toa misericòrdia, Nosgnor, a l’ha tnime sù. ¹⁹An mè cheur i l’avìa tanti sagrin, ma toe consolassion a l’han arlegrame l’ànima.

²⁰Podrìo mai pretende ij potent che Dé a staga da soa part ëd lor; ij cap ëd le nassion ch’a fan ëd decret ch’a përmëtto d’angiustissie? ²¹A fan ëd cospirassion contra la vita dij giust e a condano a mòrt ij nossent. ²²Nosgnor, contut, a l’é la piassafòrt ch’am guerna; mè Dé a l’é la rocafòrt sòlida anté ch’i treuvo n’arfugi sicur. ²³Chiel a-j darà ‘d sicur la paga ch’a mérito për tute soe gramìssie. Chiel a-j dësblerà për ij sò pecà. ²⁴Nosgnor, nòst Dé, a-j dësblerà da bin.

Nòte

1. Cfr. 1 Corint 3:20.