La Bibia piemontèisa/Testament Vej/Salm/Salm 85
Ij Salm
modifiché85. Nosgnor! Ti 't l'has vërsà con bondosità toe benedission su toa tèra
modifiché- Ël pòpol ëd Nosgnor as n'avisa coma che chiel a l'ha përdonaje ij pecà 'nt ël passà, a-j ciama che adess a lo ristabilissa 'n sò favor e a së speta 'd neuve benedission.
1Për ël magìster dla mùsica. Scrivù dai Coraita, un salm. Nosgnor! Ti 't l'has vërsà con bondosità toe benedission[1] su toa tèra; it l'has fàit torna sté bin Giacòb. 2It l'has përdonà le colpe 'd tò pòpol, it l'has ëstendù 'n vel[2] dzora 'd tùit ij sò pecà. [Anterludi]
3It l'has fàit chité[3] tuta toa fùria; it l'has tratnù toa ràbia giùsta. 4Adess variss-ne[4], Nosgnor, nòstr Salvator. Buta da banda toa ràbia anco' na vira. 5Saras-to sèmper anrabià con nojàutri? Seguiteras-to a esse 'nrabià 'dcò con le generassion ch'a vniran? 6An arnovras-to pa la vita 'ncora na vira, parèj che toa gent a peussa trové 'n ti soa gòj? 7Fane vëdde tò amor fedel. Nosgnor! Acòrd-ne la salvëssa!
8I scotrai lòn che Nosgnor a l'ha da dì, përché Nosgnor a farà la pas con sò pòpol fedel, ma ch'a lo fasa pa artorné a soa folairà. 9A l'é sicur che la salvëssa a l'é davzin-a a coj ch'a l'han ëd rispet për Nosgnor, parèj che nòstra tèra a sarà 'mpinìa 'd soa glòria. 10Amor sincer e fidelità a son ancontrasse; la liberassion e la pas a son ëvnusse 'ncontra e a l'han dasse 'n basin. 11La fidelità a chërs da la tèra e la liberassion a varda dal cel.
12Vera, Nosgnor a vërsrà con abondansa soe benedission e nòstra tèra a darà sò mësson. 13La liberassion a marcia dë 'dnans ëd chiel e a-j pronta la stra.