La Bibia piemontèisa/Testament Vej/Salm/Salm 68

←Salm 67

La Bibia piemontèisa Ij Salm

Salm 69→

Ij Salm

La Bìbia piemontèisa - Salm 068

68. Nosgnor a seurt fòra pront a batse

Ël Salmista a pitura Nosgnor coma ‘n guerié gajard e a s’arlegra che Nosgnor a deuvra soa potensa an favor ëd Sò pòpol.

¹Për ël diretor ëd la mùsica. Ëd David. Un Salm da cantésse. Nosgnor a seurt fòra pront a batse. Ij sò nemis as la dan a gambe, ij sò aversari a scapo via da chiel. ²Tanme ‘l fum a l’é bufà via dal vent, Ti i-j fase dësperde; tanme la sira as ëslèiva dë 'dnans al feu, ij pervers a son anientà dë 'dnans a Nosgnor. ³Coj ch’a veulo bin a Nosgnor, nopà, a son content; lor as arlegro dë 'dnans ëd chiel e a spricio ‘d gòj.

⁴Canté a Nosgnor! Canté ‘d làude a sò nom. Magnifiché Nosgnor ch’a cavalca an sle nìvole! Përchè Nosgnor a l’é sò nom! Arlegreve dë 'dnans ëd chiel! ⁵Chiel a l’é Pare d’ coj ch’a l’han nen un pare e avocat difensor ëd le vìdoe. Nosgnor a governa da sò palass. ⁶Nosgnor a dà na ca a coj ch’a n’han gnun-a. Chiel a delivra ij përzoné e a-j dà prosperità, ma ij pecador, arviros a soa autorità, a finisso a vive ant ël desert.

⁷Nosgnor, cand che ti ‘t vade anans a tò pòpol an menandlo an guèra, cand che Ti ‘t marce ‘nt ël desert, [Intërludi] ⁸la tèra a tërmola, vera, ij cej a fan pieuve a verse dë 'dnans a Nosgnor^[1], ël De dël Sinai, dë 'dnans a Nosgnor, ël De d’Israel. ⁹Nosgnor! Ti ’t fase pieuve an abondansa an sù tò pòpol sernù. Cand che lor^[2] a son ëstrach, ti ‘t ses sò sostegn. ¹⁰Përché ti ‘t vive antrames a lor^[3]. Ti ‘t daghe ‘d sostegn con toe bon-e benedission a coj ch’a son crasà, Nosgnor. ¹¹Nosgnor a parla^[4]; cole^[5] ch’a spantio la bon-a neuva a son n’armeja.

¹²Ij rè ch’a guido j'armeje a scapo via - a scapo via! Le bele fomne dla cà as divido j'arsorse ‘d guèra. ¹³Cand ch’i seve cogià antrames a jë strop, j’ale dle colombe as coato d’argent e d’òr lusent.

¹⁴Cand che Nosgnor, ch’a l’é Sovran a sbërgiàira ij rè, ch’a ven-a giù la fiòca an sj’àute montagne ‘d Tsalmon, ¹⁵la montagna ‘d Basan a tronegia; la montagna ‘d Basan a l’ha tante bëcche.

¹⁶Përchè vardes-to con anvìa, vojàutre montagne da le tante sime, a la montagna anté che Nosgnor a l'ha decidù 'd vive? Sensa dubi Nosgnor a vivrà ambelelà an permanensa! ¹⁷A peulo pa contesse ij chèr ch’a l’ha Nosgnor: a son mila milanta. Nosgnor a ven dal Sinai con sant ësplendrior. ¹⁸Ti ‘t monte sù an àut, Ti ‘t l’has ciapà motobin ëd përzoné. Ti ‘t arsèive ‘d tribut da j’òm^[6], comprèis coj ch’a l’ero arviros a toa autorità e pecador. Sensa dubi Nosgnor Dé a viv ambelelà.

¹⁹Nosgnor a mérita d’esse laudà. Dì aprèss dì chiel a pòrta nòstr fardel, ël Dé ch’an lìbera. [Intërludi]

²⁰Nòstr Dé a l’é ‘n Dé ch’a lìbera; Nosgnor, Nosgnor sovran a peul liberé da la mòrt. ²¹Sensa dubi Nosgnor a baston-a ij sò nemis an sla testa, an sla front ëd coj ch’a përsisto an soa arvira. ²²Nosgnor a dis: “Bele che as artirèisso ant le region leugne ‘d Basan, bele ‘dcò se a së stërmèisso ant ël fond dël mar, mi i andrìa ambelelà a ciapèje l’istèss. ²³Antlora i marcc-rai con ij pé bagnà ‘nt sò sangh e ij vòstr can a mangëran soe porsion ëd la carn dij vòstr nemis mòrt.

²⁴Nosgnor! La gent a vëdd toe procession, le procession ëd mè De, mè Rè, ch’a marcia për la strà con ëd sant splendrior. ²⁵Coj ch’a canto a marcio an testa; ij musicant a-j van dapress e a son-o ij sò strument a còrda; an mes a-i é le fije che’a son-o ij tambornin.

²⁶Laudé Dé, Nosgnor, an grande radunanse, le radunanse grande d’Israel. ²⁷A-i é ‘l cit Beniamin ch’a-j goerna, e ij prinsi ‘d Giuda an soe vestimente regaj, ansema ij prinsi ‘d Zabulon e ij prinsi ‘d Neftali.

²⁸Nosgnor a l’ha decretà che ti’t saras potent. Nosgnor! Ti ‘t l’has agì an nòstr favor, ‘t l’has mostrà Toa potensa. ²⁹Cand che ti ‘t seurte da tò templi an Gerusalem, ij rè at porto ‘d tribut. ³⁰Feve arsoné ‘l crij ‘d guèra contra le bestie sarvaje dij canèj^[7] e contra le nassion ch’as assemblo coma në strop ‘d vailèt guidà da ‘d tòr! Tùit as ësbasso e a smon-o d’òr e d’argent coma ‘d tribut.

³¹A ven-o con dij tëssù ross da l’Egit. L’Etiòpia a smon volonté dij tribut a Nosgnor. ³²Regn dël mond, canté a Nosgnor! Canté ‘d làude a Nosgnor! [Intërludi] ³³A col ch’a cavalca ant ij cej dai temp antich.

Vardé, chiel a trona fòrt. ³⁴Arconòsse la potensa ‘d Nosgnor, Soa sovranità an sù Israel e ‘l podèj ch’a ‘rvela dai cej! ³⁵Ti ‘t arleve ‘n sant ëspavent, Nosgnor, cand che ti ‘t ven-e fòra da tò templi. A l’é ‘l Dé d’Israel ch’a dà al pòpol fòrsa e potensa. Che Nosgnor a sia benedì!

Nòte

1. Cfr. Surtìa 19:18.
2. Let. “Toa ardità” (tò pòpol).
3. Let. “soa comunità”.
4. e a nunsia la vitòria.
5. Le fomne! Ël pronòm ant ël test original a l’é feminin.
6. Cfr. Efesin 4:8.
7. Visadì l’Egit.

---