La Bibia piemontèisa/Testament Vej/Rut/Rut 4

←Rut 3

La Bibia piemontèisa Rut

1 Samuel 1→

Rut

4

La Bìbia piemontèisa - Rut 04

Boz as maria con Rut

¹Antërtant Boz a l'era andass-ne a la pòrta dla sità e a l'era setasse. A l'é passaje pròpi an col moment-lì ël parent che Boz a l'avìa dit. Boz a l'ha dije: "Ti, avzinte e set-te sì". L'òm a l'é avzinasse e a l'é setasse. ²Anlora Boz a l'ha sernù des òm an tra j'ansian ëd la sità: "Seteve ambelessì," a l'ha dije, e lor a son setasse. ³Alora chiel a l'ha dije a col ch'a l'avìa 'l dirit ëd dësangagg: "Ël tòch ëd tèra ch'a l'era 'd nòst frel Elimelech, Noemi, ch'a l'é tornà da la campagna 'd Moab, a lo buta an vèndita. ⁴Mi i son dime ch'a ventava anformete e dite: S'it veule esercité tò dirit ëd dësangagg, catlo, ma se ti 't lo veule nen, dimlo, përchè mi i peussa savèjlo. Ti 't ses ël prim a d'avèj ël drit ëd dësangagg, mi i ven-o dòp ëd ti". L'àutr a l'ha rëspondù: "Òhi! Sicura ch'i veuj catelo". ⁵Ma Boz a l'ha dije: "Ël di ch'it cateras cost camp da la man ëd Noemi, it cateras ëdcò Rut, la Moabita, la fomna 'd col ch'a l'é mòrt, për porté anans ël nòm dël mòrt an sù sò patrimoni". ⁶Anlora col ch'a l'avìa 'l drit ëd dësangagg a l'ha rësponduje: "Mi i peuss nen caté col drit ëd dësangagg, dësnò i-j farìa 'd dani a mia pròpria ardità. Pija pura mè pòst ant ël drit ëd dësangagg, përchè mi i peuss nen esercitelo".

⁷Ora, a-i era na vòta la costuma an Israel, ant ël cas ëd dësangagg o d'ardità, për prové për ver tùit j'afé: un as gavava soa sàndola e a-j la dasìa a l'àutr. Costa a l'era an Israel la manera 'd porté testimoniansa. ⁸Col ch'a l'avìa 'l drit ëd dësangagg a l'ha donca dije a Boz: "Fà la compra për ti istess", e a l'ha tirà andaré soa sàndola^[1]. ⁹Boz a l'ha dije a j'ansian e a tuta la gent: "Ancheuj vojàutri i seve testimòni che mi i l'hai catà da la man ëd Noemi tut lòn ch'a l'era d'Elimelech e tut lòn ch'a l'era 'd Maclon e Chilion, ¹⁰e ch'i l'hai 'dcò pijàit coma mia fomna, dël midem temp, Rut la Moabita, vidoa 'd Maclon, për fé sicur ël nòm dël mòrt^[2] dzora a soa ardità e përchè sò nòm a vada nen a sparì an tra ij sò frej, nì da la pòrta 'd soa sità. Da ancheuj voi i në seve testimòni".

¹¹Tut ël pòpol ch'as trovava a la pòrta a l'ha rëspondù: "Nojàutri i soma testimòni", e j'ansian a l'han rëspondù: "Che Nosgnor a fasa dla fomna ch'a intra an toa ca, coma Rachel e coma Lia, che lor doe a l'han butà le fondamenta a la ca d'Israel^[3]. Ven a esse potent an Efrata e fate na bon-a arnomansa an Betlem! ¹²Che toa ca a peussa esse coma la ca 'd Peres, che Tamar a l'ha partorije a Giuda^[4], për grassia dla posterità che Nosgnor at darà da costa fomna giovna.

A nass Obed, fieul ëd Boz e Rut

¹³Peui Boz a l'ha pijàit Rut ch'a l'é dventà soa fomna. Chiel a l'é andàit anvers a chila, e Nosgnor a l'ha conceduje 'd concepì e chila ha l'ha partorije un fieul. ¹⁴E anlora le fomne a disìo a Noemi: "Ch'a sia benedì Nosgnor, che ancheuj a l'ha pa fate manché cheidun ch'a dësangagèissa. Che sò nòm a sia proclamà an Israel! ¹⁵Chiel a sarà un consolator për ti e 'l sostegn ëd toa veciaja, përchè a l'ha për mare toa nòra ch'at veul bin, e che për ti a val pì che set fieuj". ¹⁶E Noemi, pijàita la masnà e l'é butass-la an fàuda, e a l'ha faje da bàila. ¹⁷E j'avzin-e a l'han dije: "A l'é naje 'n fieul a Noemi". E chila a l'ha ciamalo Obed. Chiel a l'é stàit ël pare 'd Iesse, pare 'd David.

¹⁸Costa-sì a l'é la posterità 'd Peres: Peres a l'ha generà Chesron; ¹⁹Chesron a l'ha generà Ram e Ram a l'ha generà Aminadab. ²⁰Aminadab a l'ha generà Nacson e Nacson a l'ha generà Salmon. ²¹Salmon a l'ha generà Boz e Boz a l'ha generà Obed. ²²E Obed a l'ha generà Iesse, e Iesse a l'ha generà David.

Nòte

1. 4:7-8 cfr. Deuteronòmi 25:9.
2. Cfr. Deuteronòmi 25:5-6.
3. Cfr. Génesi 29:31.
4. Cfr. Génesi 38:27-30.