La Bibia piemontèisa/Testament Vej/Re/2Re 15

2 Rè modifiché

Pàgina revisionà

 

15 modifiché

Ël regn d’Asaria an Giuda modifiché

1Ant l’ann ch’a fà vinte-set ch’a regnava rè Geroboam an Israel, Asaria fieul d'Amasia, a l’é dventà rè 'd Giuda. 2Chiel a l’avìa sëddes agn quand ch’a l’é dventà rè, e a l’ha regnà an Gerusalem për sinquantedoi agn. Soa mare as ciamava Iecolia e a l'era 'd Gerusalem.

3Chiel a l’ha fàit lòn ch’a pias a Nosgnor, coma che sò pare Amasia a l'avìa fàit. 4Ma chiel a l’ha tolerà ij santuari pagan ch’a j’ero ant ël pais e la gent a-i andasìa për brusé d’ancens. 5Ël Signor a l'ha colpì ‘l rè con la lebra e për lòn a l'ha dovù vive ant un quartierament separà, antramentre che sò fieul Iotam a l'avìa an cària 'l palass e a governava an sël pòpol dël pais.

6J'àutre 'mprèise d'Asaria, tut lòn ch'a l'ha fàit, comprèis lòn che a l'ha portà a compiment, a son memorià ant ël lìber dij Fàit dij rè ëd Giuda. 7Asaria peui a l'é mòrt e a l'é stàit sotrà con ij sò cè ant la Sità 'd David. Sò fieul Iotam a l'ha peui regnà a sò pòst.

Ël regn ëd Zecaria an Israel modifiché

8Ant l'ann che a fà tranteut dël regn d'Asaria 'd Giuda, Zecarìa fieul ëd Geroboam a l'é vnùit a esse rè d'Israel. A l’ha regnà an Samaria për ses mèis. 9Chiel a l'ha fàit lòn ch’a l’é mal a j'euj ëd Nosgnor, com a l'avìo fàit ij sò grand. A l'ha pa arpudià ij pecà che Geroboam fieul ëd Nebat a l'avìa fàit comëtte a Israel. 10Ma Salum fieul ëd Iabes a l'ha conspirà contra 'd chiel; a l'ha sassinalo an Ibleam e a l'ha pijàit sò pòst ëd rè.

11J'àutri aveniment dël regn ëd Zecaria a son registrà ‘nt ël lìber dij Fàit dij rè d'Israel. 12Sò assassini a l’era ‘l compiment ëd la paròla dël Signor arvelà për Ieu: “Ij tò fieuj a saran astà an sël tròno d'israel për quat generassion”. E a l'é stàit pròpi parèj.

13Salum fieul ëd Iabes a l'é vnùit a esse rè ant l'ann che a fà tranteneuv ëd rè Osia 'd Giuda. Chiel a l'ha regnà un mèis an Samaria. 14Menachem fieul ëd Gadi a l'é fasse anans da Tirza an intrand an Samaria e a l'ha batù Salum fieul ëd Iabes. Chiel a l'ha massalo e a l’é fasse rè a sò pòst.

15J'àutri fàit dël regn ëd Salum, comprèisa la cospirassion ch’a l’avìa organisà a son memorià ant ël lìber dij Fàit dij rè d'Israel.

Ël regn ëd Menachem an Israel modifiché

16An coj dì lì, Menachem a l’ha vastà la sità ‘d Tifsach e tut lòn ch’a j’era ant la region fin-a a Tirza, përchè cola gent a l’era arfudasse ‘d rendse a chiel. A l’ha fàit massé tuta la popolassion e 'dcò fàit ësventré tute le fomne an condission.

17Ant l'ann che a fà tranteneuv ëd rè Asaria 'd Giuda, Menachem fieul ëd Gadi a l'é dventà rè d'Israel. Chiel a l'ha regnà des agn an Samaria. 18Ma Menachem a l'ha fàit lòn che a l'è mal a j'euj ëd Nosgnor, nen ëslontanand-se dai pëcà che Geroboam fieul ëd Nebat a l'avìa ancoragià an Israel. Antant che a regnava, 19Tiglat-Pileser[1] rè d'Assiria a l'ha anvasà 'l pais, e Menachem a l'ha pagaje mila talent d'argent përchè a lo giutèissa a sodé 'l contròl dël regn. 20Coj sòld-lì chiel a l’avìa rafaje a jë sgnor d’Israel, pretendend da minca un ëd lor ch’a paghèisso sinquanta sicl d’argent al rè d’Assiria. Parèj ël rè d’Assiria a l’ha pì nen tacà Israel e a l’é andass-ne dal pais.

21J'àutri aveniment dël regn ëd Menachem, comprèis tut lòn che a l'ha fàit, a son memorià ant ël lìber dij Fàit dij rè d'Israel. 22Peui Menachem a l'é mòrt e sò fieul Pecachia a l'ha arpiassalo ant ël regn.

Ël regn ëd Pecachia an Israel modifiché

23Ant l'ann che a fà sinquanta 'd Rè Asaria 'd Giuda, Pecachia fieul ëd Menachem a lé vnùit esse rè d'Israel. Chiel a l'ha regnà an Samaria për doi agn. 24Ma Pecachia a l’ha fàit lòn ch’a l’é mal a j’euj ‘d Nosgnor. A l’ha arfudà dë slontanesse dai pecà che Geroboam, fieul ëd Nebat a l’avìa cissà Israel a comëtte. 25Contra 'd chiel a l'ha conspirà Pecach fieul ëd Remalia e comandant ëd soa armeja. Chiel ansema a Argob e Arie e con sinquanta Ghileadita a l'han assassinà Pecachia an Samaria ant la tor dël palass real. Antlora Pecach a l'é stàit rè a sò pòst.

26J’àutri aveniment dël regn ëd Pecachia e tut lòn che chiel a l’ha fàit a l’é anregistrà ant ël lìber dij Fàit dij Rè d’Israel.

Ël regn ëd Pecach an Israel modifiché

27Ant l'ann ch’a fà sinquanta 'd rè Asaria 'd Giuda, Pecach fieul ëd Remalia a l'é dventà rè d'Israel. Chiel a l'ha regnà an Samaria për vint agn. 28Ma Pecach a l’ha fàit lòn ch’a l’é mal a j’euj ‘d Nosgnor. A l’ha arfudà dë slontanesse dai pecà che Geroboam, fieul ëd Nebat a l’avìa cissà Israel a comëtte.

29Ant ël temp ëd rè Pecach d'Israel, a l'è rivaie Tiglat-Pileser rè d'Assiria, che a l'ha ocupà Ijon, Abel Bet Maca, Ianoach, Chedes, Casor, Ghilead e la Galilea, comprèis ël teritòri ëd Neftali. Chiel a l'ha deportà la gent an Assiria. 30Osea fieul d'Ela a l'ha conspirà contra 'd Pecach fieul ëd Remalia. Chiel a l'ha sassinalo e pijàit sò pòst ëd rè ant l'ann che a fà vint dël regn ëd Iotam fieul d'Osia.

31J’àutri aveniment dël regn ëd Pecach e tut lòn che chiel a l’ha fàit a l’é registrà ant ël lìber dij Fàit dij Rè d’Israel.

Ël regn ëd Iotam an Giuda modifiché

32Ant lë scond ann ëd Pecach fieul ëd Remalia rè d'Israel, Iotam fieul d'Osia lé vnùit esse rè ëd Giuda. 33Chiel a l'avìa vinte-sinch agn cora ch’a l'é ‘ncaminasse a regné e a l'é stàit rè për sëddes agn an Gerusalem. Soa mare a l'era Ierusa fija 'd Zadoch.

34Chiel a l'é portasse coma che Nosgnor a-j pias, pròpi coma che a l'avìa fàit sò pare Osia. 35Mach che ij santuari pagan ch’a-i ero ant ël pais chiel a l’ha toleraje e la gent a l'ha seguità a smon-e ‘d sacrifissi e a brusé d'ancens ambelelà. Chiel a l'ha 'dcò fàit fé la Pòrta dëdzora dël Templi ‘d Nosgnor.

36J’àutri aveniment dël regn ëd Pecach e tut lòn che chiel a l’ha fàit a l’é registrà ant ël lìber dij Fàit dij Rè ‘d Giuda. 37An coj di ël Signor a l'ha ancaminasse a mandé rè Retsin lë scond ëd Siria e Pecach fieul ëd Remalia contra 'd Giuda. 38Iotam a l'é peui mòrt e a l'é stàit sotrà con ij sò antich ant la sità 'd sò cè David. Sò fieul Acas a l’é suceduje.

Nòte modifiché

  1. O “Pul”, n’àutr nòm ch’a l’avìa.