La Bibia piemontèisa/Testament Vej/Osea/Introdussion

Introdussion

L'atività 'd predicassion dël profeta Osea a podrìa colochesse ant ël regn d'Israel (dël Nord) giusta anans che soa capital Samaria a l'é conquistà da j'Assir dël 721 a. C. e cheich ann apress cola dël profeta Amos. An col temp-lì, ël regn d'Israel a l'era mnassà da l'Assiria, la potensa pì fòrta dël Vzin Orient. Ant ël tentativ ëd goerné soa andipendensa, Israel a sërcava 'd gieughe con j'aleanse polìtiche, an passand da la fidelità a l'Assiria a 'd progèt d'arvira favorì da l'Egit che, bele se antlora a l'era pitòst débol, a l'era 'l concorent ël pì grand dj'Assir. Costa situassion polìtica a podìa dventé arzigosa për la religion d'Israel, ch'a l'era an continuassion tentà 'd veneré d'àutre divinità (con ij sò stil ëd vita e prinsipi) dacant al Dé vré e viv. A sperava parèj d'oten-e na sicurëssa sossial pì granda e 'n dësvlopament econòmich pì belfé. A na derivava 'dcò na tension interna con dësparità sossial greve. Osea a prevëd le conseguense negative 'd costa situassion. Israel a sarà crasà da l'armada dl'Assiria, ij sò cap a saran deportà e jë scampà a trovran arfugi an Egit.

Pì 'd lòn, da la mira përsonal, Osea a vivìa probàbil n'esperiensa 'd mariagi dramàtica. Fasend front a na fomna traditriss. Osea a comprend che costa soa vicenda a podìa fé part ëd soa vocassion ëd profeta e che sò amor për Gomer, soa sposa infedel, a podìa dventé 'l model dl'amor grand che a men-a Nosgnor a arserché e andeje dré a sò pòpol, fin-a ant ij moment che lor a së slontan-o da chiel. Costa përsuasion për lòn a dventa la nos sentral ch'as dësvlopa dantorn la predicassion profética.

Osea a l'é un dij profeta ij pì antich dont ël mëssage a l'é butà për ëscrit e ch'a sia rivà a nojàutri an costa forma. Cost lìber a l'é nen ëstàit butà ansema tut ant na vira, ma a l'é sgrandisse pòch a pòch ant ël cors dël temp fin-a a rivé a la configurassion d'ancheuj, ch'a buta ansema sota 'n sol contnù sota 'l nòm d'Osea e ant un temp precis (cfr. 1:1). I-i lesoma che, për denunsié l'infidelità dj'Israelita, Osea a la comparision-a a soa situassion ëd famija: coma chiel a l'é mariasse con na fomna ch'a l'é arvelasse 'nfidela, parèj ël pòpol ëd Dé a l'é manifestasse 'nfidel anvers a sò Signor (1:2; 3:5). A l'é për lòn che 'l castigh a tomberà dzora d'Israel. A sarà 'n castigh dur e sever, ma l'amor ëd Dé për sò pòpol a resta costant, durèivol (4:1-14:1). Ël lìber as completa con l'anunsi che Dé a arsanirà sò pòpol e a lo farà artorné a chiel (14:2-10).

Schema

Ël mariage d'Osea - 1:2-3:5
Nosgnor a acusa e a castija Israel - 4:1-14:1
L'artorn e la prosperità d'Israel - 14:2-10.