La Bibia piemontèisa/Testament Vej/Neemia/Introdussion

Artorn

---

Introdussion a Neemìa

Ël lìber ëd Neemia a l’é la continuassion ëd col d’Esdra. A l’ha ‘n caràter foravìa, përchè ch’a l’ha la forma ‘d n’archeuita ‘d memòrie e d’un diari ‘d Neemìa midem.

Chiel a l’era ‘n làich, fonsionari a la cort d’Antaserse, rè ‘d Persia. A l’avìa arseivù la licensa ‘d portesse a Gerusalem con ël but d’arcostruve le difèise dla sità e ‘d riorganisé la vita sivil e religiosa. Cora ch’a riva a Gerusalem, chiel a fà l’ispession ëd neuit dij murajon, e as rend cont dl’urgensa ‘d fé d’arparassion (capitoj 1-2).

Neemia a treuva na colaborassion granda, ma a l’ha ‘dcò da afronté l’oposission dle popolassion nen ebràiche e, dzortut, le dificoltà econòmiche dj’Ebreo (capìtoj 3-7).

Al sènter dël liber, ant in capitoj 8-10, Esdra a parëss dacant a Neemìa ant ël cors ëd na grandiosa letura pùblica dla Lege, ch’a l’é seguità da na longa orassion ëd penitensa e ‘d n’angagg seri dël pòpol d’esse fidej a l’osservansa dla Lege.

Apress ëd vàire liste ‘d nòm ch’an fornisso ‘l quàder ëd la populassion ebràica ‘d Gerusalem e dij sò anviron (capìtoj 11-12:26), a arpija la conta ‘d Neemia ch’a parla dl’inaugurassion ofissial dij murajon arcostruì e ‘d vàire régole establìe da chiel ch’a riguardo dzortut l’osservansa dël Saba (capìtoj 12:27-13).

Cost lìber an fà conòsse le dificoltà ancontrà ant la comunità ebràica ant ij prim temp apress ëd l’esili an Babìlònia. L’arcostrussion dij murajon ëd Gerusalem a rapresenta l’angagg ëd na comunità ch’a sërca d’artrové soa consistensa sivil e religiosa, fondà an sla Lege ebràica, cola ch’a l’ha da dé ‘l caràter ëd na sità ideal, Gerusalem, ch’a dventa ‘l sènter d’un mond ebràich ch’a l’avìa pì gnun-e struture polìtiche autònome.

Neemìa a l’é ‘n përsonagi antëressant për sò coragi, soa ciarëssa ‘d ment an soe decision e n’onestà granda. Aranda ‘d chiel a-i era na gent motobin sagrinà che, tutun a l’avìa dë speranse gròsse e l’anvìa ‘d resté unì e concordi. Neemia a lo guida con abilità e discression, ma soa fòrsa la pì granda a stasìa ant la preghiera che, an minca ‘n moment ëd dificoltà, chiel a adressa a Nosgnor.

Schema

• L’artorn ëd Neemia a Gerusalem 1:1-2:20
• L’arcostrussion dij murajon 3:1-7:72
• Letura pùblica dla Lege 8:1-10:39
• J’àutre arforme ‘d Neemìa 1:1-13:31