La Bibia piemontèisa/Testament Vej/Michea/Introdussion
Introdussion modifiché
Michea a l'é dl'istess temp dël profeta Isaìa e 'd pòch posterior al profeta Amos. A l'era originari 'd na contrà a sud dël regn ëd Giuda. A pòrta anans soa mission ëd profeta a Gerusalem sota 'l regn ëd Iotam, Acas e Esechia, donch ant la sconda metà dël sécol ch'a fa eut a. C.. Chiel a l'é testimòni dla croa dël regn d'Israel, a nòrd, e 'd soa sità capital Samara, dël 721 e forse 'dcò, an séguit, dl'invasion dj'Assir ant ël regn ëd Giuda, a meridion, dël 701 a. C.
Ĕl lìber ëd Michea a conten un mëssage che, ant la sostansa, a peul trové soa orìgin ant l'época dël profeta, ma ch'a l'é stàit con ël temp ëslargà con la gionta d'àutri test che a col mëssage a në tiro l'ispirassion, fin-a a rivé a la configurassion d'ancheuj. Ës lìber a l'é donca stàit formà pòch a pòch, dal sétim sécol fin-a a l'época apress ëd l'esili (apopré 'l quint sécol). An soa forma final a conten doe sòrt ëd mëssage ch'as alterno an tra 'd lor: l'anonsi dël giudissi e dël castigh divin (capitoj 1-3 e 6:1-7) e la promëssa 'd salvëssa (capìtol 4-5 e 7:8-20). Ant ël condané la sicurëssa 'd coj ch'a pràtico l'angiustissia e ch'as dédico a l'idolatrìa, ël contnù dël test ëd Michea a smija a la predicassion d'Amos, d'Osea e 'dcò d'Isaìa, dl'istess temp ëd Michea. Se 'l mëssagi originari d'Isaìa a peudìa fondesse an sla croa 'd Samaria, comprèisa coma 'n castigh divin, ant n'época sucessiva, l'istess mëssage a peudìa adressesse 'dcò a j'abitant dël regn ëd Giuda, che, an efet, a sarìa 'dcò drocà, coma col d'Israel, për man d'un pòpol forësté.
Ës lìber, contut, a conten pa mach 'd paròle 'd condan-a. An efet, a dis ëdcò lòn che Nosgnor a së speta da sò pòpol, visadì, ch'a pràtica la giustissia, ch'a veuja bin con dosseur, ch'as compòrta con umilità dë 'dnans ëd chiel.
Për l'avnì as nunsia, ëd pì, na certëssa ch'a dà consolassion: Nosgnor a formerà con ij dzorvivù un pòpol neuv, guidà da 'n rè dëssendent ëd David e ch'a porterà la pas (5:1-4a). Gerusalem a dventerà 'l leugh anté che le nassion a vniran për ëscoté 'l Signor (4:1-5).
Schema modifiché
- Dé a condan-a ij regn ëd Giuda e Israel - 1:2-3:12.
- Dé a promët salvassion e 'n rè neuv (4:1-5:14)
- Dé a fà càusa a sò pòpol - 6:1-7:7
- Speransa e preghiera dël pòpol - 7:8-20