La Bibia piemontèisa/Testament Vej/Isaia/Isaia 36

←Isaìa 35

La Bibia piemontèisa Isaìa

Isaia 37→

La Bìbia piemontèisa - Isaia 36

Isaia

36

L’Assiria a 'nvad Giuda

¹A l'é stàit ant l'ann dël rè Esechia ch'a fà quatòrdes, che Senacherib rè d'Assiria a l'é fasse padron ëd tute le fortësse 'd Giuda. ²Peui ‘l rè d’Assiria a l’ha mandà da Lachis a Gerusalem sò gran Mèistr da Cope^[1] ansema a n'armèja bin granda për batse con Rè Esechia. J’Assir a l’han pijà posission dacant a l'aquedot ch’a dà d'eva al bassin dë dzora, an sla stra ch’a men-a al Camp dël Lavandé.

³A son andaje ancontra Eliachim fieul d'Elchia, ël mèistr ëd ca, Sebna lë scriturari e Joach fieul d'Asaf l'archivista. ⁴Ël Gran Copé a l'ha dije ch’a portèissa cost mëssagi a Esechia:

“Përparèj a dis ël gran rè, ël rè dl'Assiria: lòn che a veul dì costa confidensa che it mostre? ⁵Penses-to forse che na paròla sempia a peussa an guera ciapè ël pòst dël consèj e dla fòrsa? Ore, an chi l'has-to fiusa ti, ch'it arvire contra 'd mi? ⁶Varda, ti ‘t apoge an sl’Egit, a l’é coma s’it pogèisse a ‘n pontel ëd cana s-ciapà ch’a traversa la man an forandla a col che as buta ansima; parèj a l'é Faraon rè d'Egit për tuti coj ch'a l'han fiusa an chiel^[2]! ⁷Se contut ti ‘m dise: Noi i l'oma fiusa an Nosgnor nòst Dé, é-lo pa l'istess Dé che Esechia a l'ha dëstruvune ij santuari e j'autar, comandàndje a la gent ëd Giuda e Gerusalem ëd prostërnesse mach dë 'dnans a l’autar ch’a-i é ambelessì a Gerusalem? ⁸E bin, fà un pat con mè sgnor, ël rè d'Assiria; mi it darai doimila cavaj, se it podras procurete 'd sivalié për monteje! ⁹Con toa armèja bin pcita, ti ‘t podries gnanca gatijé ‘l pì fiach dij contingent ëd le trope ‘d mè padron, fin-a s’it l’avèisse l’agiùt dij chèr e dij sivalié d’Egit! ¹⁰Pì ‘d lòn, penses-to forse ch’i l’abia ocupà tò pais sensa la diression dël Signor? A l’é stàit ël Signor midem a dine: ‘Ataca cost pais e fane ravagi!’”.

¹¹Eliachim, Sebna e Joach a l'han rësponduje al Gran Copé: “Parla ai tò servitor an aramàich, përchè noi i lo comprendoma; parla nen an ebràich përchè lòn ch’it dise a podrìa rivé a j'orije dla gent ch'a l'è an sle muraje”.

¹²Ma ‘l gran copé a l'ha dije torna: “Miraco che i son ëstàit ëmnà da tò sgnor e a ti da part ëd mè sgnor për dite sòn, opura për j'òm ch’a stan an sij rampar e che pì tòst che an pressa a saran obligà, con vojàutri, a mangé sò escrement e a bèive l'eva che a pisso ai sò pé?”.

¹³Anlora 'l Gran Copé a l'è aussasse e a l'ha crijà an ebràich con vos fòrta: “Scoté le paròle dël gran rè, dël rè d'Assiria! ¹⁴A dis ël rè: Ch’i sie pa ambrojà da Esechia, përchè chiel a podrà pa salveve! ¹⁵Che av cissa nen Esechia a avèj fiusa ant ël Signor an disend: Sicura, Nosgnor an farà lìber; costa sità a podrà pa esse butà ant le man dël rè d'Assiria. ¹⁶Deje pa dament a Esechia, përchè përparèj a dis ël rè d'Assiria: Fé la pas con mi e aréndve; antlora tùit a podran mangé la fruta 'd soa vigna e 'd sò fié e tùit a podran bèive l'eva 'd soa sisterna; ¹⁷fin-a al moment che mi i ven-a a porteve ant un pais parija dël vòst, pais ëd gran e 'd most, ëd pan e 'd vigne. ¹⁸Ch’av daga gnun-a ilusion Esechia an disendve: Nosgnor an farà lìber. Le divinità dle gent miraco l'han-ne mincadun-a liberà sò pais da le man dël rè d'Assiria? ¹⁹Andova son-ne ij dio d'Amat e d'Arpad? Dova le divinità ëd Sefarvaim? Miraco l'han-ne liberà Samaria da mie man? ²⁰Coj ch'a son, an tra ij dio 'd cole bande, che a l'àbio liberà sò pais da mie man? Podrà-lo forse ël Signor liberé Gerusalem da mie man?”.

²¹Coj-lì a son ëstàit ciuto e a l'han rësponduje gnanca na paròla, përchè la consëgna dël rè a l'era: rëspondije nen. ²²Eliachim fieul d'Elchia, ël mèistr ëd ca, Sebna segretari e Joach fieul d'Asaf l'archivista a son presentasse da Esechia con le vestimente s-ciancà e a l'han arportaje le paròle dël Mèistr ëd Cope.

Nòte

1. O “Rabsiaché”.
2. Cfr. Esechiel 29:6-7.