La Bibia piemontèisa/Testament Vej/Genesi/Genesi 5

←Genesi 4

La Bibia piemontèisa Genesi

Genesi 6→

Génesi

5

Ij dissendent d’Adam

La Bìbia piemontèisa, Génesi 5

¹Costa-sì a l’é la lista genealògica dij dissendent d’Adam. Quand che Nosgnor a l’ha creà l’òm, a l’ha falo a soa imàgine. ²A l’ha creà l’òm e la fomna^[1], a l’ha benedìje e a l’ha ciamaje “j’uman”^[2]. ³Quand che Adam a l’avìa sent e trant'agn, a l’é dventà ‘l pare d’un fieul ch’a l’era pròpi coma chiel - a soa midema imàgin. A l’ha ciamà sò fieul Seth. ⁴Apress ëd la nassensa ‘d Seth, Adam a l’ha vivù 'ncor eutsent agn e a l’ha avù d’àutri fieuj e fije. ⁵Adam a l’é mòrt a l’età ‘d neuvsent e trant'agn. ⁶Seth a l’avìa sent e sinch agn quand a l’ha generà Enos. ⁷Apress ëd la nassensa d’Enos, Seth a l’ha vivù 'ncor eutsent e set agn, e a l’ha avù d’àutri fieuj e fije. ⁸Seth a l’é mòrt a l’età ‘d neuvsent e dódes agn. ⁹Enos a l’avìa novant'agn quand ch’a l’ha generà Chenan. ¹⁰Apress ëd la nassensa ‘d Chenan, Enos a l’ha ‘ncor vivù d’àutri eutsent e quìndes agn, e a l’ha avù ‘d fieuj e ‘d fije. ¹¹Enos a l’é mòrt a l’età ‘d neuvsent e sinch agn.

¹²Chenan a l’avìa stant'agn quand ch’a l’ha generà Malalel. ¹³Apress ëd la nassensa ‘d Malalel, Chenan a l’ha 'ncor vivù eutsent e quarant'agn, e a l’ha avù d’àutri fieuj e fije. ¹⁴Chenan a l’é mòrt a l’età ‘d neuvsent e des agn. ¹⁵Malalel a l’avìa sessantessinch agn quand ch’a l’ha generà Giared. ¹⁶Apress ëd la nassensa ‘d Giared, Malalel a l’ha ‘ncor vivù d’àutri eutsent e tranta agn, e a l’ha avù d’àutri fieuj e fije. ¹⁷Malalel a l’é mòrt a l’età d'eutsent e novantessinch agn.

¹⁸Giared a l’avìa sentessessantedoi agn quand ch’a l’ha generà Enòch. ¹⁹Apress ëd la nassensa d’Enòch, Giared a l’ha ‘ncora vivù d’àutri eutsent agn e a l’ha avù d’àutri fieuj e fije. ²⁰Giared a l’é mòrt a l’età d neuvsentesessantedoi agn. ²¹Enòch a l’avìa sessantessinch agn quand ch’a l’ha generà Matusalem. ²²Apress ëd la nassensa ‘d Matusalem, Enòch a l’ha ‘ncora vivù tërzent agn e a l’ha avù ‘d fieuj e ‘d fije. ²³La vita antrega d’Enòch a l’é durà tërzentesessantessinch agn. ²⁴ Enòch a l’ha seguità a esse an ëstrèita comunion con Nosgnor, peui a l’é dësparì përchè Nosgnor a l’ha pijalo con chiel^[3].

²⁵Matusalem a l’avìa senteotantesset agn quand ch’a l’ha generà Lamech. ²⁶Apress ëd la nassensa ‘d Lamech, Matusalem a l’é ancor vivù setsentotantedoi agn, e a l’ha avù ‘d fieuj e ‘d fije. ²⁷Matusalem a l’é mòrt a l’età ‘d neuvsentesessanteneuv agn.

²⁸Lamech a l’avìa senteotantedoi agn quand ch’a l’ha avù ‘n fieul. ²⁹A l’ha butaje ‘l nòm ëd Noè, perchè a disìa: “Sto-sì an solevrà da nòst travaj e da nòste fatighe ant ël lauré la tèra che Nosgnor a l’ha maledì”.

³⁰Apress ëd la nassensa ‘d Noè, Lamech a l’ha vivù ‘ncora sinchsentenovantessinch agn e a l’ha avù d’àutri fieuj e ‘d fije. ³¹Lamech a l’é mòrt a l’età ‘d setsentestanteset agn. ³²Noè a l’avìa già sinchsent agn quand ch’a l’ha generà Sem, Cam e Iafet.

Nòte

1. Cfr. Maté 19:14; March 10:6.
2. Cfr. Génesi 1:27-28.
3. Cfr . Ebréo 11:5; Giuda 14.