La Bibia piemontèisa/Testament Vej/Esdra/Esdra 8

←Esdra 7

La Bibia piemontèisa Esdra

Esdra 9→

La Bìbia piemontèisa - Esdra 08

Esdra

8

Ij cap ëd famija ch’a son tornà con Esdra

¹Costi-sì a son, con soa genealogìa, ij cap ëd famija ch'a son partì con mi da Babilònia sota 'l regn d'Artasserse.

²Dij fieuj ëd Pincas: Ghersom; dij fieuj d'Itamar: Daniel; dij fieuj ëd David: Catus ³fieul ëd Secania; dij dissendent ëd Paros: Zecaria, con chiel a son ëstàit anregistrà 150 òm; ⁴dij dissendent ëd Pacat Moab: Elieoenai fieul ëd Zerachia, e con chiel 200 òm; ⁵dij dissendent ëd Zatu: Secania fieul d'Jacasiel e con chiel 300 òm; dij fieuj d'Adin: Ebed fieul ëd Jonata e con chiel 50 òm; ⁶dij dissendent d'Adin, fieul ëd Gionatan, e con chiel 50 òm; ⁷dij dissendent d'Elam: Isaia, fieul d'Ataliae con chiel 70 òm ⁸dij dissendent ëd Sefatia: Zebadia fieul ëd Micael, e con chiel 80 òm; ⁹dij dissendent ëd Joab, Obadia fieul ëd Jechiel, 218 òm con chiel; ¹⁰dij dissendent ëd Bani, Selomit fieul ëd Josifia, con 160 òm; ¹¹dij dissendent ëd Bebai, Zecaria fieul ëd Bebai, con 28 òm; ¹²dij dissendentj d' Asgad, Jocanan ben Acatan, con 110 òm; ¹³dij dissendent d'Adonocam: ij derié, costi-sì a son ij nòm: Elifelet, Jeuel e Semaia, con 60 òm; ¹⁴dij dissendent ëd Bigvai, Utai e Zacur con 70 òm.

Ël viage dj’esilià anvers ëd Gerusalem

¹⁵Mi i l'hai butaje ansema dacant al canal ch'a scor anvers d'Ahava. Ambelelà i l'oma butà camp për tre di. I l'hai sërcà an tra la gent e ij sacerdòt, ma i l'hai pa trovà 'd Levita. ¹⁶Anlora i l'hai mandà a ciamé ij cap: Elieser, Ariel, Semaia, Elnatan, Jarib, Natan, Zecaria e Mesulam, con j'istrutor Joiarib e Elnatan. ¹⁷E i l'hai comandaje d'andé da Ido, cap an Casifia, e i l'hai dije lòn che a dovìo dije a Ido e ai sò frej^[1] atendent ant ël teritòri ëd Casifia: valadì 'd mandeje d'anservient për ël templ ëd nòst Dé.

¹⁸Da già che la man benéfica 'd nòst Dé a l'era dzora 'd nojàutri, a l'han mandane n'òm d’erudission, dij fieuj ëd Macli, fieul ëd Levi, fieul d'Israel, visadì Serebia, con ij sò fieuj e frej: disdeut përson-e; ¹⁹nen mach, ma Casabia e con chiel Isaia, dij fieuj ëd Merari, sò frel e ij sò fieuj, vint përson-e. ²⁰Dj'atendent, che David e ij prinsi a l'avìo butà al servissi dij Levita: 220 atendent. A son ëstàit anregistrà për nòm.

²¹Ambelelà, davzin al canal Ahava, i l'hai fàit fé digiun, për umiliesse dë 'dnans ëd Nosgnor e ciameje un viagi bon për nojàutri, le nòstre masnà e tut lòn ch'i l'oma. ²²An efet, im n'ancalava pa 'd ciameje al rè ëd soldà e 'd sivalié për dësfende arlongh ëd la stra për un nemis possìbil; nen mach, i l'avìo dije al rè: “La man ëd nòst Dé a l'é ansima a coj che a lo sërco, për sò bin; nopà soa potensa e soa flin-a a l'é dzora 'd coj ch'a lo chito”. ²³Parèj ch'i l'oma digiunà e pregà Nosgnor ch’an dèissa ës favor e chiel a l'ha giutane.

²⁴Peui i l'hai sërnù dódes an tra ij cap dij sacerdòt: Serebia e Casabia e des dij sò frej con lor: ²⁵a l'han peisà sò argent, òr e j'asi, ch'a l'ero oferta për ël templ ëd nòst Dé fàita dal rè, dai sò consijé, dai sò ofissiaj e da tuti j'Israelita che as trovavo da cole bande. ²⁶I l'hai peisà e daje pròpi a lor: argent: 650 talent, asi d'argent: sent. dël pèis ëd sent talent; òr: sent talent, ²⁷peui ëdcò: vas ëd bronz dorà e 'd valor: doi, pressios parèj dl'òr. Cope d'òr vint: ëd 1000 darich. ²⁸I l'hai dije: “Voi i seve consacrà al Signor; costi tesòr a son consacrà; l'argent e l'òr a son l'oferta volontaria a Nosgnor, Dé dij nòsti antich. ²⁹Vijé e goerneje, fin-a tant che i peusse pa peiseje dë 'dnans ai cap dij prèive, ai Levita e ai cap ëd famija d'Israel a Gerusalem ant le stansie dël templ ëd Nosgnor.

³⁰Anlora ij sacerdòt e ij Levita a son piasse 'l badò dl'argent, dl'òr e dle cope, për porteje a Gerusalem ant ël templ ëd Nosgnor. ³¹Ël di che a fà dódes dël prim mèis, a son partì dal fium Ava për andé a Gerusalem e la man ëd nòst Dé a l'era dzora 'd nojàutri: chiel a l'ha liberane da j'atach dij nemis e dij brigant arlongh dla stra. ³²I soma rivà a Gerusalem e i soma piasse tre di d'arlass. ³³Ël quart di, l'argent l'òr e j'utiss a son ëstàit peisà ant ël templ ëd nòst Dé e consegnà ant le man dël prèive Meremot, fieul d'Uria, che a l'era con Eleasar, fieul ëd Picas; darera 'd lor a-i j'era Josabad, fieul ëd Josua, e Noadia, fieul ëd Binui, tùit e doi Levita. ³⁴Nùmer e pèis, a-i j'era tut. A l'é anregistrasse 'l pèis total an col temp là. ³⁵Coj ch'a tornavo da la përzonìa, j'esilià, a l'avìo smonù d'olocàust al Dé d'Israel: dódes tòr për tut Israel, novantesses moton, stantedoi babèro, dódes boch për ël pecà: ël tut an olocàust a Nosgnor. ³⁶A l'han peui armetù l'edit dël rè ai sàtrap reaj e ai governador da là dël Giordan, costi-sì a son ëvnùit a giuté ël pòpol al templ ëd Dé.

Nòte

1. Ël TM a 'rpòrta: אָחִיו (ʾachiv) ''sò frel". As réputa preferìbil: וְאֶחָיו (vʾecajv, “e ij sò frèj” = “parent”); përparèj la volgata:   ''et fratres ejus".