La Bibia piemontèisa/Testament Vej/Cronache/2Cronache4

←2 Crònache 3

La Bibia piemontèisa Ij lìber dle Crònache

2 Crònache 5→

La Bìbia piemontèisa - 2 Crònache 04

4

Ij furniment dël Templi

¹Salomon a l’ha ‘dcò fàit fabriché n’autar ëd bronz largh e longh vint cùbit e àut des^[1]. ²Peui a l’ha fàit fonde ‘l Bassin Gròss (o Mar) ëd Bronz, ch’a mzurava des cùbit d'un canton a l'àutr: a l'era n'anel complèt e a fongàva sinch cùbit. Na forma 'd coron-a, longa tranta cùbit, a fassava an broa tuta soa sirconferensa^[2]. ³Sota l'orlo tut d'antorn, a l’era ‘nsercià da bestie da la smijansa'd beu, des për cùbit, an doe file e fondù ansema al bassin.

⁴La vasca as pogiava dzora 'd dódes beu: tre a vardavo anvers ëd tramontan-a, tre 'd ponent, tre a mesdì e tre vers orient. Ël gran bassin as pogiava ansima e soe part darera a l'ero voltà anvers l'intern. ⁵A l'era spèss na branca^[3] e an brova a l'avìa la midema forma dël bòrd ëd na copa, parèj 'd na fior ëd liri. A podìa conten-e tremila mzure^[4].

⁶A l'ha 'dcò fàit fé des bassin^[5] e a l'ha butane sinch a drita e sinch a gàucia, për lavé lòn ch'a sarìa stàit sacrificà e ch'a ventava purifiché, combin che ij sacerdòt as lavavo drinta 'l Mar ëd bronz. ⁷A l'ha fàit fé ‘dcò des candlé d'òr^[6], conform la forma prescrivùa, e a l'ha butaje ant ël Templi, sinch a drita e sinch a snistra; ⁸a l'ha ëdcò fàit fé des tàule^[7] che a l'ha 'dcò butà ant ël Templi, sinch a drita e sinch a mancin-a, ansema a sent cope d'òr.

⁹A l'é fasse fé la cort dij sacerdòt, la cort gròssa e le pòrte dla midema cort, ch'a l'ha arvëstì 'd bronz. ¹⁰Ël bassin a l'ha butalo da la banda drita, a sud-est.

¹¹Curam a l'ha fàit fé le caudere, le palëtte e j'aspèrges. Chiel a l'ha finì sò travaj ant ël Templi 'd rè Salomon: ¹²le doe colòne, ij doi balon dij capitej dzora dle colòne, doe grije për cheurvie ansima ai capitej e dzora dle colòne, ¹³quatzent pomgranà për le doe grije, doi file 'd pomgranà për minca grija e për cheurve ij doi balon dij capitèj dëdzora dle colòne, ¹⁴ij des ampeduss e le des àmole an sle basi, ¹⁵ël bornel, ùnich, e ij dódes beu che a-i jë stan sota, ¹⁶caudere, palëtte, forcheton e tùit j'utiss che Curam-Abi a l'avìa fàit an bronz soasì për ël Templi 'd rè Salomon. ¹⁷Ël rè a l'ha faje fonde ant la valada dël Giordan, ant la fonderìa, an tra Sucòt e Zereda^[8]. ¹⁸Tùit sti asi Salomon a l'ha faje fé an gròssa quantità, da nen podèj conté 'l pèis dël bronz.

¹⁹Salomon a l'ha fàit tùit oget për ël Templi: l'autar d'òr e le tàule, andova che as butavo ij pan da smon-e, ²⁰ij candlé e le làmpie d'òr d'anvischesse, com a l'era stàit prëscrivù, an facia a la cela, ²¹le fior, làmpie e jë stopalum d'òr, dël pì fin, ²²ij cotej, j'aspèrges, le cope e ij brasé d'òr fin. Për lòn ch'a riguarda le pòrte dël Templi, ij batent d'andrinta vers ël Sant dij Sant e ij batent ëd la navà dël Templi a l'ero d'òr.

Nòte

1. 9,2 m për 4,6 m. Cfr. Surtìa 27:1-2.
2. 4,6 m për 2,3 m për 13,8 m ëd sirconferensa.
3. 8 centimeter.
4. 63 chiloliter.
5. Cfr. Surtìa 30:17-21.
6. Cfr. Surtìa 25:31-40.
7. Cfr. Surtìa 25:23-30.
8. Coma’nt ël test paralel ëd 1 Rè 7:46.