La Bibia piemontèisa/Testament Vej/Cronache/1Cronache 11

←1Crònache 10

La Bibia piemontèisa Ij lìber dle Crònache

1 Crònache 12→

1 Crònache

La Bìbia piemontèisa - 1 Crònache 11

11

David a riva esse rè

¹Parèj tuta Israel a l'é rassemblasse d'antorn a David a Ebron. E a l'han dije: “Nojàutri i soma toa gent, carn ëd toa carn e sangh ëd tò sangh”. ²Na vira, al temp che Saul a l'era nòst rè, it j’ere ‘l comandant general ëd le fòrse armà d'Israel. Nosgnor tò Dé a l'avìa dite: “Ti 't ëmneras an pastura Israel, mè pòpol; e it saras soa guida”. ³Anlora tuti j'ansian d'Israel a son andàit a trové 'l re a Ebron, e a l'han fait n'aliansa con chiel ëdnans a Nosgnor e a l'han sacralo rè d'Israel, conform a lòn che a l'avìa dit Dé per boca 'd Samuel.

Conquista 'd Gerusalem

⁴David e l’armada antrega d’Israel a son portasse contra 'd Gerusalem, che antlora as ciamava Jebus; ambelelà a-i ëstasìo ij Gebusé^[1], abitant ëd col pais. ⁵Ij Gebusé a l'avìo dije a David: “Ambelessì, ti t'intreras pa!”. Tutun David a l'é fasse padron ëd la fortëssa 'd Sion, ch’a l'é vnùita parej a esse ciamà: la Sità 'd David.

⁶David a l'avìa dit a soe trope: “Ël prim che a fraprà un Gebusé a dventrà ‘l comandant general ëd mie armeje. Ël prim a monté a l'è stait Ioab, fieul ëd Seruià, parèj che dun-a a l'é stait nominà general an cap.

⁷David a l'é anstalasse ant la fortëssa, ch’a l’ha fala esse soa abitassion. Për lòn a l'é staita peui ciamà "Sità 'd David". ⁸Chiel a l’ha peui fàit ëslarghé la sità tut dantorn, dal terapé ciamà Milo, fin-a a j'anviron, antramentre che Ioab a l'ha restaurà l'àutra part ëd la sità. ⁹David a 'ndasìa a chërse an podej: Nosgnor ëd l'Univers a l'era con chiel.

Ij tre guerié ij pì vajant ëd David

¹⁰Costi-sì a l’ero ij cap dij vajant ëd David che a l'ero a sò servissi, e che a l'han giutalo con tuta Israel a fé sicur ël regn për proclamelo rè, parej tanme Nosgnor a l'avia promëttuje a Israel. ¹¹Costa-sì a l’é la lista dij guerié ‘d David.

Iasobeam, ël Cacmonita, cap dj’ufissié ch’a l'han massà tërzent òm con soe lanse ant n’ùnica bataja. ¹²A seguìa Eleasar, fieul ëd Dodo, dël clan d'Acoca, un dij tre vajant ëd David. ¹³Chiel a l'era con David a Pasdamim; e ij Filisté a son rassemblasse ambelelà për combate. A-i j'era ansilì un camp pien d'òrdi, e la gent a ‘rculava ‘dnans ai Filisté; ¹⁴ma peui j'òm d'Eleasar a son a butasse an mes ëd la coltivassion, a l’han difendù 'l camp e a l’han butà an derota ij Filisté. Parej che la vitòria che a l'ha conceduje Nosgnor a l'é staita strasordinaria.

¹⁵Un bel di, tre dij tranta vajant, a son calà a trové David da para dël ròch, ant la balma d'Adulam, antramentre che l'esércit Filisté a l'avìa butà camp ant la comba dij Refaita. ¹⁶David a stasìa an col arfugi fortificà, e a Betlem a-i jë stasìa na guarnigion dij Filisté. ¹⁷David, tutun, a l'avìa anvìa d'eva bon-a e a l'ha dit: “Òh, se mach cheidun am dèissa da beive, ëd che gust i beiverìa l'eva dla sisterna che a-i è a l'intrada 'd Betlem!”. ¹⁸Anlora coj tre, passand an mes al campament dij Filisté, a son andait a tiré d'eva a la sisterna dl'intrada 'd Betlem e a l'han smonùjla a David. Tutun chiel, a l'ha pa vorsùine beive. A l'ha spatarala tuta për tèra, rendend-la na libagion smonùa a Nosgnor. ¹⁹Antramentre a disìa: “Che Dé am varda ‘d bèila! St'eva-sì a l'é'l sangh ëd costi òm che a son andait a rìsigh ëd soa vita: a l'han butà an privo la vita për portemla!”. David, donch, a l'ha pa vorsù bèivne. Tut sòn a l'é n’esempi dj’amprèise ‘d coj tre.

Ij tranta guerié pì vajant ëd David

²⁰Abisai, frel ëd Ioab, a l'era cap dij tranta. Un di, a colp ëd lansa a l'ha massà terzent òm, tutun soa fama as podìa pa paragonesse a cola 'd coj tre. ²¹A l'é stait considerà ancora 'd pì, an tra 'd coj che a l'era a cap, tutun a l'é pa stait a l'autëssa dij mérit dij tre vajant.

²²Benaia, da Cabtsel, fieul dël gran guerié Ioiada, a l'avìa fait vàire prodësse. A l'ha massà doi fieuj d'Ariel, e doi guerié vajant o ancora doi leon ëd Moab e, ant un di 'd fiòca, a l'ha massà un leon ch’a l’era tombà drinta ‘d na sisterna l’ora che chiel a-j ëstasìa dapress. ²³A l'é andàit a bate dcò n'Egissian, àut pì 'd doi méter^[2], che a portava na lansa gròssa parej ëd na subia da tëssior; tutun a l'ha afrontalo con un baròt, a l'ha s-ciancaje 'd man l'asta e a l'ha massalo.

²⁴Coste a son staite j'ampreise 'd Benaia, fieul ëd Ioiada, e chiel a l'é fasse un nòm an tra ij tre vajant. ²⁵Chiel-sì a l'é stait considerà pì che tuit ij tranta, tutun a l'è mai stait a l'autëssa dj' àutri tre. David a l'ha constituilo al comand ëd la vardia real.

²⁶Ij vajant dl'armeja a l'ero: Assael, frel ëd Joab; Elcanan, fieul ëd Dodo, betlemita; ²⁷Samot, da Aror; Cheles, ël Pelonita; ²⁸Mira, fieul d'Iches da Tecoa; Abieser, d'Anatot. ²⁹Sibecai, Cusatita; Ilai, dël clan d'Acoach; ³⁰Marai, da Netofa; Cheled fieul ëd Baana, da Netofa; ³¹Itai, fieul ëd Ribai, da Guiba 'd Beniamin; Benaia, da Piraton; ³²Curai, dal torent ëd Gas; Abiel, l'Arbatita; ³³Asmavet, da Bacurim; Eliacba, da Salbon; ³⁴ij fieuj ëd Hasem, ël Guisonita; Jonatan, fieul ëd Sagué l'Ararita; ³⁵Achiam, fieul ëd Sacar l'Ararita; Elifal fieul d'Ur; ³⁶Chefer, ël Mecheratita; Achia, ël Pelonita; ³⁷Chesro, da Carmel; Naarai fieul d'Esbai; ³⁸Joel, frel ëd Natan; Mibcar, fieul d'Agrì; ³⁹Selech l'Amonita; Nacrai, da Beròt, ëscudié 'd Ioab, fieul ëd Seruià; ⁴⁰Ira, da Iatir; Gareb, da Iatir; ⁴¹Uria, l'Hitita; Zabad, fieul d'Aclai; ⁴²Adinà, fieul ëd Sisa, dla tribù 'd Ruben, cap dij Rubenita, ij tranta òm che a l'ero con chiel. ⁴³Canan, fieul ëd Maacà; Joissafat, ël Mitnita; ⁴⁴Usià, d'Aistarot; Sama e Jeiel, fieuj ëd Cotam d'Aroer; ⁴⁵Jediael, fieul ëd Simrì; Jocà, sò frel ël Tissita; ⁴⁶Eliel, ël Macavita; Jeribai e Joissavià, fieuj d'Elnàam; Itmà, ël Moabita; ⁴⁷Eliel, Obed e Jaassiel, da Sobaià ^[3].

Nòte

1. Cfr. Giosuè 15:63; Giùdes 1:21.
2. Lét. “sinch cùbit”.
3. Zoba.