La Bibia piemontèisa/Testament Vej/Age/Introdussion

Introdussion

J'Israelita ch'a l'ero tornà a Gerusalem da l'esili, apress che Babilònia a l'era stàita conquistà da Ciro, rè 'd Persia, dël 539 a. C., a l'avìo trovà 'n pais devastà e bandonà. La dzorvivensa a l'era 'ncora pì malfé për càusa dij racòlt cativ e dla misèria. Ëdcò ant l'imperi persian la situassion polìtica a dasìa 'd sagrin përchè ch'a l'era pa stabil. Cand che 'l rè Cambise, sucessor ëd Ciro, a l'é mòrt (dël 522 a. C.) a l'ero fasse 'd disórdin ant la sossietà,

An coste condission ëd dificoltà granda, j'Israelita a deuvìo afronté 'd sagrin ëd minca sòrt e a pensavo ch'a fussa pa na priorità l'arcostrussion dël templi 'd Nosgnor a Gerusalem, ch'a l'era stàit dësblà dai Babilonèis ant ël 587.

Ël profeta Agé as adressa a j'Israelita e a preuva 'd feje comprende che soe dificoltà a vnisìo da n'anfiachiment ëd soa fede 'd lor, ch'as manifestava giusta con la mancà arcostrussion dël templi.

Ël lìber d'Agé as arferiss a l'atività dël profeta an tra l'aost e lë dzember dl'ann 520 a. C. (cfr. 1:1,15; 2:10,18,20) e a 'rpòrta ij sò dëscors, adressà dzortut al governator Zorobabel e al sacerdòt Giosué. Ël profeta a nunsia che Nosgnor a castija sò pòpol cand che chiel a dà pen-a pì 'd soe ca che dla ca 'd Nosgnor (1:1-14). Dal moment che 'l di che Nosgnor a riva a l'é press, ël templi a l'ha da esse arcostrovù për podèjlo bin arsèive. Ël templi a podrà esse fin-a pì splendrient che anans (2:1-9) e lolì a butrà fin a la situassion mìsera anté che 'l pòpol as treuvava (2:10-14). A l'é antlora che Nosgnor a benedirà sò pòpol e a-j darà 'n rè neuv (2:15-23).

Schema

Ël neuv templi e j'esigense 'd santità - 1:1-2:14
Le promësse 'd Nosgnor - 2:15-23