La Bibia piemontèisa/Testament Neuv/Roman/Roman 8

←Roman 7

La Bibia piemontèisa Roman

Roman 9→

La Bibia piemontèisa - Roman 08

Litra dl'Apòstol Pàul ai cristian ëd Roma

8

La relassion dël cristian con lë Spìrit Sant

¹A-i é adess, donca,  pì gnun-a condan-a për coj ch'a son an comunion con Crist Gesù [coj ch'a vivo^[1] pì nen conform a la carn, ma conform a lë Spirit], ²përchè la lege dlë Spìrit ch'a dà la vita an Crist Gesù a l'ha delivrame da la lege dël pecà e dla mòrt. ³An efet, Nosgnor a l'ha realisà lòn che la lege a podìa nen fé përchè a l'era fiacà da la natura uman-a^[2]. Cand che Nosgnor a l'ha mandà sò Fieul ant na natura tanme la nòstra e coma 'n sacrifissi për ël pecà, chiel a l'ha condanà 'l pecà 'nt la carn, ⁴parèj che lòn che la lege a pretend^[3] a sìa compì an nojàutri che adess i l'oma 'n comportament ch'a l'é pì nen dominà da nòstra natura ‘d pecà^[4], ma da lë Spìrit^[5]. ⁵Përchè coj ch'a vivo conform a la carn^[6], a dan da ment^[7] a le còse dla carn; ma coj ch'a vivo conform a lë Spìrit^[8], a dan da ment a le còse dlë Spìrit. ⁶Ora, dé da ment a nòstra natura 'd pecà a l'ha mach për arzultà la mòrt, ma dé da ment a lë Spìrit a l'ha për arzultà la vita e la pas; ⁷përchè dé da ment a nòstra natura 'd pecà a mostra che un a l'é un nemis ëd Nosgnor, da già che col-lì as sogeta nen a la lege ëd Nosgnor e, an efet, sogetessje a l'é gnanca bon a felo. ⁸Coj ch'a vivo conform a soa natura 'd pecà^[9] a Nosgnor a-j piaso pròpi nen^[10].

⁹Ora vojàutri i vive nen conform a la natura 'd pecà^[11] ma conform a lë Spìrit, se për dabon lë Spìrit a viv an vojàutri. Ora, se cheidun a l'ha nen lë Spìrit ëd Crist, col-lì a l'é nen dij sò. ¹⁰Ma se Crist a l'é an vojàutri, vòst còrp a l'é coma s'a fussa mòrt për colpa dël pecà, ma lë Spìrit a l'é vòstra vita për motiv ëd la giustissia^[12].

¹¹Donca, se lë Spìrit ëd col ch'a l'ha arsussità Gesù dai mòrt a viv an vojàutri, col ch'a l'ha arsussità Crist dai mòrt a arvivrà 'dcò ij vòstri còrp mortaj për sò Spìrit ch'a viv an vojàutri^[13]. ¹²Për conseguensa, car ij mè frej e seur, i l'oma n'òbligh^[14] nen vers nòstra natura 'd pecà 'd vive conform a sò caràter ¹³(përchè s'i vive conform a nòstra natura ‘d pecà a veul dì andé 'ncontra a la mòrt) ma se, con l'agiut ëd lë Spirit, i mortifiche j'assion dël còrp, i vivreve. ¹⁴Përchè tuti coj ch'a son ëmnà da lë Spirit ëd Nosgnor a son ëd fieuj 'd Nosgnor.

¹⁵Përché i l'eve nen arseivù në spìrit ëd servitù ch'av men-a torna a la pàu, ma i l'eve arseivù lë Spìrit d'adossion ch'an fà crijé "Abba, Pare^[15]". ¹⁶A l'é col istess Ëspìrit ch'an rend la testimoniansa ch'i soma ‘d fieuj 'd Nosgnor. ¹⁷E s'i soma 'd fieuj, anlora i soma 'dcò d'ardité (visadì d’ardité 'd Nosgnor, ardité ansema con ël Crist) se për dabon i patioma con chiel për esse 'dcò glorificà con chiel^[16].

¹⁸Përchè, fàit tùit ij cont, i stimo che lòn ch'i dovoma patì ancheuj a peussa gnanca esse paragonà a la glòria ch'a vnirà e ch'an sarà arvelà un bel di, ¹⁹përchè 'l grand e ardent desideri dla creassion^[17] a l'é l'aspetativa ch'a sio arvelà ij fieuj ëd Nosgnor. ²⁰La creassion a l'é stàita sogetà a la futilità, nen ëd soa volontà^[18], ma a càusa 'd Nosgnor ch'a l'ha sogetajla - ant la speransa ²¹che la creassion a sarà delivrà da la servitù a la corussion për intré 'dcò chila 'nt la gloriosa libertà dij fieuj ëd Nosgnor. ²²Përchè i savoma che la creassion antrega fin-a adess a l'é coma s'a gëmmèissa për ij dolor dël part. ²³Nen mach lolì, ma 'dcò nojàutri, ch'i l'oma le primissie dlë Spìrit, i gëmmoma andrinta al cheur ant la granda aspetativa 'd nòstra adossion, visadì la redension ëd nòst còrp^[19]. ²⁴An efet, i soma salvà an ësperansa. Ora, la speransa ch'as vëdd a l'é pì nen ësperansa: përchè mai un spererìa 'ncora lòn che già a vëdd? ²⁵Ma s'i speroma lòn ch'i vëddoma nen, a l'é ch'i lo spetoma con përseveransa.

²⁶Dl'istessa manera, lë Spìrit an giuta, përchè i soma déboj e i savoma nen preghé coma ch'as dovrìa^[20]: a l'é për lòn che lë Spìrit a prega për nojàutri con dij sospir ch'a son tròp ancreus për dije con ëd paròle, ²⁷ma col ch'a scruta nòst cheur a conòss la ment ëd lë Spìrit, përchè lë Spìrit a 'ntërced për ij sant^[21] conforma a la volontà 'd Nosgnor.

²⁸I savoma 'dcò che tute le còse a contribuisso al bin ëd coj ch'a veulo bin a Nosgnor, pròpi lor ch'a son ciamà conform ai sò propòsit, ²⁹përchè coj che chiel a l'ha preconossù, chiel a l'ha 'dcò predestinaje a esse conform a l'imàgin ëd sò Fieul, parèj che sò Fieul a sìa 'l prim nà antrames motobin ëd frej e 'd seur. ³⁰Peui, coj ch'a l'ha predestinaje, a l'ha 'dcò ciamaje; e coj ch'a l'ha ciamaje a l'ha 'dcò diciaràje giust^[22]; e coj ch'a l'ha diciaraje giust, a l'ha 'dcò glorificaje.

³¹Còsa dirom-ne donca a propòsit ëd tut sòn? Se Nosgnor a l'é për nojàutri, chi ch'a podrìa esse contra 'd noi? ³²Sensa dubi, col ch'a l'ha nen risparmià sò Fieul ùnich, ma ch'a l'ha dalo a la mòrt për tùti nojàutri, com darà-lo pa 'dcò minca àutra còsa con chiel?

³³Chi mai a podrìa porté d'acuse contra j'elet ëd Nosgnor? Nosgnor medésim a l'é col ch'a-j giustifica. ³⁴Chi mai a podrìa condaneje? El Crist a l'é col ch'a l'é mòrt, e cheicòsa 'd pì 'd lòn, a l'é col ch'a l'é arsussità, ch'a l'é 'dcò a la drita 'd Nosgnor e che fin-a a prega^[23] për noi. ³⁵Chi é-lo ch'a podrìa mai separene da l'amor dël Crist? Peudria-lo esse ij sagrin, o j'aflission, o la përsecussion, o la famin-a, o la nudità, o 'l perìcol, o la spa? ³⁶Coma ch'a l'é scrit: "I andoma 'ncontra a la mòrt tùit ij di; i soma considerà tanme 'd feje da masel"^[24]. ³⁷Al contrari, an tute ste còse-sì i l'oma completa vitòria gràssie a Col ch'a l'ha vorsune bin!

³⁸Përchè i son sicur che nì la mòrt, nì la vita, nì d'àngej, nì 'd prinsipà, nì le potense, nì le còse dël di d'ancheuj, nì le còse ch'a vniran, ³⁹nì l'autëssa, nì la përfondità, nì gnun' àutra còsa an tuta la creassion, a podrà mai separene da l'amor ëd Nosgnor coma chiel a l'ha mostralo an Crist Gesù^[25], Nosgnor.

Nòte

1. o "ch'a marcio".
2. O “carn”.
3. O: "a s’aspeta".
4. O “da la carn”.
5. O: "nojàutri ch'i caminoma nen conform' a la carn, ma conform' a lë Spirit".
6. O: "Coj ch'a son conform a la carn".
7. O: "A son afessionà a".
8. O: "Coj ch'a son conform a lë Spirit".
9. O: "ch'a son an la carn".
10. O: "A peudo nen piasèj a Nosgnor”.
11. O: "I seve nen an la carn", ò "i vive nen sota la dominassion dla carn".
12. Visadì: "dla giustissia ëd Crist, da lòn che Crist a l'ha vagnà për nojàutri ch'i chërdo an Chiel".
13. Cfr. 1 Corint 3:16.
14. O "i soma debitor".
15. Cfr. March 4:36; Galat 4:6.
16. 8:15-17 cfr. Galat 4:5-7.
17. O "dle creature".
18. Cfr. Génesi 3:17-19.
19. Cfr. 2 Corint 5:2-4.
20. O "lòn ch'i dovoma ciamé".
21. Tùit ij cristian a son ciamà "sant" përchè a son ëd gent a part, sernù e consacrà a Nosgnor.
22. o "giustificà".
23. O "a intërced".
24. Cfr. Salm 44:22.
25. O "ch'a l'é 'n Crist" ecc.