La Bibia piemontèisa/Testament Neuv/Maté/Maté 6

←Maté 5

La Bibia piemontèisa Maté

Maté 7→

La Bìbia piemont+isa - Matè 06

6

La limòsna

¹“Pijeve bin varda ‘d nen fé vòstra limòsna dë 'dnans a la gent për ess-ne vardà, përchè parèj i arsèivreve pa l’arcompensa da vòst Pare ch’a l’é an cel. ²Donca, cand ch’it fas toa limòsna, fà nen soné la tromba dë dnans ëd ti, coma ch’a fan j’ipòcrita ant le sinagòghe e për le strà mach për fesse laudé da la gent. An vrità 'v diso che cola-lì a sarà l’ùnica arcompensa ch’a n’avran. ³A l’opòst, cand ch’it fas toa limòsna, che toa man mancin-a a sapia nen lòn ch’a fà la drita, ⁴përchè toa limòsna a l’ha da resté segreta. Antlora tò Pare, ch’a vëdd tut lòn ch’as fà an segret, a t’arcompenserà 'n pùblich.

La preghiera

⁵Cand ch’it preghe, fà ch’it sie nen tanme j’ipòcrita, përchè a lor a-j pias ëd preghé bele drit an pé ant le sinagòghe^[1] e ai canton ëd lë strà për fesse vëdde da la gent^[2]. An vrità iv diso che cola-lì a sarà l’ùnica arcompensa ch’a l’avran. ⁶Ma cand ch’it preghe, intra an toa stansia e, sarà la pòrta, prega tò Pare ch’a l’é bin present ant ij leugh pì segret; e tò Pare, ch’a ved tut lòn ch’a l’é segret, at në darà l’arcompensa.

⁷Ora, cand ch'i preghe, parlé nen tant për parlé coma ch'a fan ij pagan ch'a penso che con soa ciaciara as faran ëscoté. ⁸I l'eve nen da smijé a lor, përchè vòst Pare a sà bin còsa ch'i l'eve da manca fin-a dë dnans ch'i-j lo ciame.

L’orassion ëd Nosgnor  

⁹Vojàutri, donca, cand ch’i preghe, dì: “Nòst Pare ch’it ses an cel, ch’a sia onorà^[3] tò nòm. ¹⁰Ch’a ven-a tò regn, ch’as fasa tòa volontà an tèra come a l’é fàita an cel. ¹¹Dane 'ncheuj nòst pan ëd minca di. ¹²E përdon-a ij nòstri débit, tant 'mè noi i-j përdonoma ai nòstri debitor^[4]. ¹³E fane nen tombé 'n tentassion^[5], ma liber-ne da minca mal^[6]. Përché a l’é a Ti ch’a aparten ël regn, e la potensa, e la glòria për sèmper. Amen”.

¹⁴An efet, s’i përdon-e coj ch’a l’han mancà contra ‘d voi, ëdcò vòst Pare a përdonerà dal cel ij vòsti mancament^[7], ¹⁵ma se voi i përdon-e nen coj ch’a l’han mancà contra ‘d voi midem, vòst Pare a përdonerà ‘dcò nen ij vòsti mancament^[8].

Ël digiun

¹⁶Cand ch’i feve ‘l digiun, pijeve nen n’aria neca e sbatùa coma ch’a fan j’ipòcrita, përchè lor a rendo dësfigurà soa facia a pòsta mach përchè la gent a vëdda ch’a fan digiun. An vrità iv diso che cola-lì a sarà l’ùnica arcompensa ch’a l’avran. ¹⁷A l’opòst, cand ch’it fase digiun, përfùmte ij cavèj e làvte la facia ¹⁸përchè j’àutri as n'ancòrzo nen che ti ‘t fase digiun, ma ch’a lo vëdda mach tò Pare, ch’a ved tut lòn ch’as fà 'n segret, e chiel at arcompenserà.

Un tesòr an cel

¹⁹Ambaroneve nen dij tesòr an sla tèra, che 'mbelessì ij verm a-j rusio e a jë sgàiro e ij làder a fan dij përtus e a -i pòrto vìa^[9]. ²⁰Ambaroneve pitòst dij tesòr an cel, andova che ij verm a i-j rusio pa e a peudo nen sgaireje e 'nté che ij lader a peudo nen intré e porteje via. ²¹Përchè 'nté ch’a-i é vòst tesòr, là a sarà dcò vòst cheur.

Ël ciàir dël còrp

²²Ij tò euj a son tanme ‘n ciàir ch’a dà ‘d lus a tò còrp^[10]. Se ij tò euj a son san, tò còrp antregh as ampiniss ëd lus; ²³ma se ij tò euj a vëddo mal, tò còrp antregh a sarà 'nt lë scur. Se la lus ch’it pense d’avèj a l’é, an efet, dë scur, lë scur ch’a n’arzulta a sarà torna pì grand.

Nosgnor e ij sòld

²⁴Gnun a peul serve doi padron, përchè, o a vorerà mal a un e a vorerà bin a l’àutr; o as afessionrà a un e dëspresierà l’àutr; i peude nen serve Nosgnor e ij sòld^[11] ant ël midem temp.

Ij sagrin ëd la vita

²⁵Siché iv diso: sagrineve^[12] nen për vòsta vita, ëd lòn ch’i l’avreve da mangé o da bèive; nì për vòst còrp e 'd lòn ch'i sareve vestì: la vita a l'é nen ëd pì che ‘l mangé e ‘l còrp ëd pì che la vestimenta? ²⁶Vardé mach j’osej dël cel: lor a sëmno nen, nì a mësson-o, nì a fan ëd baron ant ij grané. Vòst Pare, ch’a l’é 'n cel, contut, a-j goerna. A l'é ch’i vale pa vojàutri motobin ëd pì che lor? ²⁷E chi a l'é col an tra ‘d voi che a fòrsa ‘d sagrin, a peudrìa gionteje a soa vita un mes ras^[13]?

²⁸E përchè i seve tant an crussi për la vestimenta? Amprende coma ch’a chërso ij liri dij camp: lor a travajo nen nì a filo; ²⁹tutun, iv diso che fin-a Salomon, an tuta soa glòria, a l’é nen ëstàit vestì coma un ëd lor^[14]. ³⁰Se donca Nosgnor a soagna parèj ij camp ëd n’erba ch’a-i é ancheuj e che doman a l’é campà ant ël feu, a farà-lo nen ëd pì për vojàutri, gent ëd pòca fede ch’i seve? ³¹Siché, sagrineve pa 'n disand: cò' i l'avrom-ne da mangé o da bèive? Opura, ‘d cò' i sarom-ne vestì? ³²Tut sossì a l’é ij pagan ch’a lo sërco, ma vòst Pare, ch’a l’é 'n cel, a sa bin ch’i l’eve da manca ‘d tute ste còse. ³³Vojàutri, contut, sërché prima ‘l Regn ëd Nosgnor e fé lòn che për chiel a l’é giust^[15] e tute ste còse av saran dàite sul pat. ³⁴Donca, sagrineve nen ëd l’indoman, përchè ai sagrin ch’a-i saran antlora i pensereve doman. Ij sagrin d’ancheuj a son già pro për vojàutri.

Nòte

1. Cfr. Luca 18:10-14.
2. Cfr. Maté 23:5.
3. O “santificà”.
4. O “coma noi i përdonoma a coj ch’a l’han ofendùne”
5. O “e lass-ne pa tombé an tentassion”, let. "pòrtne nen ant un temp ëd tentassion".
6. O “da minca mal”, o "dal maléfich", visadì dal diav.
7. O “pëccà”.
8. 6:14-15 cfr. March 11:25-26.
9. Cfr. Giaco 5:2-3.
10. O “Ël ciàir dël còrp a l’é l’euj”.
11. O “Mamon” (na divinità pagan-a ch’a rapresenta ij sòld).
12. O “crussieve”.
13. N’antica mzura ‘d longhëssa ch’a valìa 60 cm. 
14. Cfr. 1 Rè 10:4-7; 2 Crònache 9:3-6.
15. O “soa giustissia”.