La Bibia piemontèisa/Testament Neuv/Gioann/Introdussion
Pcita antrodussion a l’Evangeli ‘d Gioann
modifichéBin-ëvnù a l’evangeli second Gioann, un dij quatr liber dël Testament Neuv ëd la Bìbia, dedicà a la vita, al ministeri e a la dotrin-a ‘d Gesù, ël Crist, ël Signor e Salvator dël mond. Scrivù da Gioann, ëdcò conossù coma l’apòstol Gioann, o Gioann l’evangelista, cost test a l’é stàit compilà forse an tra la fin dël prim sécol e l’inissi dël second sécol d. C.
L’autor, Gioann, a l’era un dij dódes prim dissépoj ‘d Gesù e un testimòni dirèt dj’aveniment contà ant l’evangeli. Soa manera dë scrive as arconòss për sò stil ancreus e riflessiv, ch’a cissa na comprension pì përfonda dla figura ‘d Gesù e ‘d soa mission ëd salvassion.
La diferensa an tra cost evangeli e j’àutri tre a l’é che Gioann a varda j’istess aveniment da na mira pì teològica e spiritual, armarcand la divinità ‘d Gesù e soa relassion ëstrèita con Dé so Pare. Cost evangeli a presenta ‘d tema ‘d pèis grand coma l’amor, la lus, la vrità e la vita eterna, butand an evidensa ‘l caràter sentral ëd la fede an Gesù Crist coma ‘l mojen për oten-e la salvassion e la comunion con Dé.
Gioann a dà ‘n pèis grand ëdcò a l’idèja dla “nassensa neuva” o d’argenerassion ëspiritual e a invìta ij letor a anadiesse për un senté ‘d trasformassion e arnovament përsonal ch’a renda nòstra vita sèmper pì confòrm al caràter moral e spiritual ëd Gesù midem. Ant l’istess temp, a buta an evidenza l’importansa dl’amor e dla compassion anvers al pròssim, armarcand coma la pràtica ‘d na tal virtù a l’é la marca caraterìstica dij dissépoj génit ëd Gesù.
Ant la conta ‘d cost evangeli i conossëreve vàire përsonagi ch’a l’han ëstabilì na relassion ancreusa con Gesù, minca un ëd lor a pòrta ‘n mëssagi ùnich për ij letor. I trovreve, për esempi, ël rëscontr ëd Gesù con Nicodèmo e ch’a riguarda la “nassensa da l’àut” e la conversassion ëd Gesù con na fomna samaritan-a ch’a l’avìa ancontrala ch’a tirava d’eva da ‘n poss. Cost racont a dà na prospetiva ch’a ‘nlùmina a propòsit ëd la sèj spiritual dl’ànima uman-a.
Për fela curta, l’evangeli second Gioann a l’é n’euvra ancreusa e essensial për coj ch’a l’han anvìa d’andé pì përfond an soa conossensa dla fede cristian-a e mej comprende la vita e ‘l mëssagi d Gesù, ël Crist. Cost evangeli a ispira speransa, amor e na comprension pì përfonda an tra Dé e j’uman, che chiel a l’ha creà pròpi për podèj esse an comunion con chiel. A l’é n’anvit a na fede pì sòlida e na relassion ëspiritual pì përfonda con ël Salvator. Bon-a letura e meditassion!