La Bibia piemontèisa/Testament Neuv/Efesin/Introdussion

Introdussion a l’Epìstola a j’Efesin

La litra ai cristian ëd la sità d’Efeso (o “Epìstola a j’Efesin”) a l’é na composission ëd l’apòstol Pàul scrivùa an tra j’agn 60 e 62 d. C. damentre che chiel a l’era an prison a Roma për càusa ‘d soa fede, ch’a l’era considerà na mnassa për l’òrdin ëd la società. Efeso a l’era na sità granda ant l’antica Asia Minor (ancheuj la Turchìa). A l’era ‘n senter important për l’evangelisassion cristian-a. A trata ‘d vàire sugèt për l’edificassion dij cristian.

(1) La Grassia e la Redension. Pàul anandia soa epìstola armarcand la grandëssa dla grassia ‘d Dé e dla Redension per ël mojen ëd l’euvra ‘d Gesù Crist. A l’é cost ël sogèt sentral ëd tuta l’epìstola. Pàul a dëspiega an che manera Dé a l’ha sernù ‘d salvé dal pëccà òm e fomne travers dla person-a e l’euvra dël Crist. Nòstra salvassion a ven da la grassia ‘d Dé për la fede an Crist, e a l’é pa l’arzultà dij nòstri mérit. La vita che Gesù a dà, sia a d’Ebrèo che a përson-e d’àutra origin, a n’arzulta ant un cheur neuv e a në stil ëd vita neuv an cost mond.

(2) L’unità dla Cesa (ël moviment cristian). Pàul a parla ‘d coma d’Ebrèo e non-ebrèo (ij Gentij) a son ëstàit riunì ant na sola famija për ël moien ëd la fede ant Gesù, ël Crist. Costa unità a l’é rapresentà coma ‘n còrp, dont ël Crist a l’é la testa e j chërdent a na son ij sò vàire member. La Cesa, coma ‘l Còrp ëd Crist, e ‘l mariage a son figure dël Crist e dla Cesa.

(3) La vita cristian-a pràtica. L’epistola a j’Efesin a conten ëdcò d’amaestrament pràtich sù coma vive na vita cristian-a. Pàul a parla dl’amor, dla vrità, dla santità e dl’ubidiensa a Dé. A cissa ij chërdent a vive ‘d manera degna dla vocassion ch’a l’han arseivùa.

(4) La lòta spiritual. Pàul a dis ai cristian ëd vardesse bin da le fòrse spirituaj dla cativéria che, an ësto mond, a fan guèra contra Dé e contra coj ch’a-j aparten-o. Për costa rason i cristian a l’han da butesse adòss n’armura spiritual special për ess-ne guernà e për afronteje.

Tut curt, l’Epìstola a j’Efesin ëd Pàul a l’é ‘n mëssagi dë speransa, unità e d’istrussion pràtiche për ij cristian. A l’é na part important dël patrimòni cristian e a smon-a d’amaestrament pressios an sla grassia ‘d Nosgnor e an sla vita cristian-a.