La Bibia piemontèisa/Testament Neuv/Corint/1Corint 14

←1 Corint 11

La Bibia piemontèisa Litre ai Corint

1 Corint 15→

La Bìbia piemontèisa - 1 Corint 14

1 Corint

14

La profëssìa e la glossolalìa

¹Angageve fòrt ant l’amor, ma ch’i l’abie 'dcò n’anvìa ardenta d’arsèive 'd don carismàtich, dzortut ëd profetisé^[1]. ²An efet, col ch’a l’ha 'l carisma dla glossolalìa^[2] a parla pa nen a la gent, ma a Nosgnor. Gnun d’àutri a peul comprende lòn ch’a dis: le còse misteriose ch’a prononsia a son mach për chiel. ³A l’opòst, col ch’a profetisa, a parla a la gent con ëd paròle d’edificassion, d’esortassion e 'd confòrt^[3]. ⁴Chi ch’a pràtica la glossolalìa a edìfica mach chiel midem, ma col ch’a profetisa, a lo fà për l’edificassion dla comunità antrega^[4].

⁵I vorìa bin che tuti a l’avèisso 'l carisma dla glossolalìa, ma motobin ëd pì dla profëssìa. A l’é mej ëd profetisé che 'd parlé ant na lenga misteriosa, foravìa ch’a-i sia cheidun ch’a na daga l’interpretassion për l’edificassion ëd la comunità.

⁶Car ij mè frej e seur, s’i vnèissa da voi e che mi iv parlèissa ant na lenga misteriosa, còs av sërvirìa-lo se mia paròla av portèissa pa nen d’arvelassion, o 'd conossense, o 'd professìe o d’amaestrament? ⁷Për l’istess, fin-a 'd còse inanimà coma la fluta o la chitara^[5] a l’han da soné soe nòte 'd manera ciàira, dësnò coma ch’as podrìa arconòsse l’un-a da l’àutra? ⁸O s’a l’é nen ciàir ‘l segn ch’a dà la tromba, chi é-lo ch’as pronterìa a la bataja?

⁹Për l’istess, s’i parle a la gent con na lenga che lor a capisso nen, com a faran-ne a savèj lòn ch’i dise? A sarìa com a parlé al vent! ¹⁰Al mond a-i é tante lenghe diverse, e tute a veulo bin dì cheicòsa^[6], ¹¹ma s’i capisso nen lòn che un a veul dime cand ch’am parla, për chiel i sarai mach un foresté, e chiel a sarà për mi 'n foresté. ¹²L’istess vojàutri, da già ch’i l’eve n’anvìa ardenta d’arsèive 'd don carismàtich, avèjne pura an abondansa, ma ch’a sio dzortut për l’edificassion ëd la comunità.

¹³Ëd conseguensa, chi ch’a l’ha 'l carisma dla glossolalìa, a l’ha da preghé përchè ch’a-i sìa ‘dcò cheidun ch’a-j fasa da tradutor^[7]. ¹⁴Se mi i preghèissa ant na lenga misteriosa, a l’é mè spìrit ch’a prega, m’as capiss nen lòn ch’i diso^[8].

¹⁵Lòn ch’i l’hai donca da fé? I l’hai da preghé ant lë spìrit ma 'dcò con ëd paròle ch’as capisso. I l’hai da canté ant lë spìrit, ma ‘dcò 'd manera che la gent am capissa. ¹⁶Se ti ’t benedisse^[9] Nosgnor mach con lë spìrit, coma podran-ne coj ch’at comprendo nen ëd giontesse a toa preghiera e rend-ne grassie^[10] - s’a capisso nen lòn ch’it dise? ¹⁷A sarà bin vera che con lòn  ti 't rende grassie a Nosgnor, ma j’àutri a na saran pa nen edificà.

¹⁸Mi i ringrassio Nosgnor ch’i pràtico la glossolalìa 'd pì che tuti vojàutri, ¹⁹ma, ant n’adunansa dla cesa, i preferisso mej dì sinch paròle che tuti a capìsso për dé d’amaestrament a d’àutri, che dì des-mila paròle ant na lenga për lor misteriosa.

²⁰Car ij mè frej e seur, sie nen ëd masnà cand ch’as trata ‘d comprende ste còse-sì, ma sie 'd masnà an malissia. An ëd ròbe dë sta sòrt-sì i l’eve d’avèj l’inteligensa 'd përson-e madure. ²¹Ant le Scriture^[11] a l’é scrit: “I parlerai a mè pòpol për ël mojen ëd foresté ch’a parlo an d’àutre lenghe^[12], e parèj am comprendran nen. I lo diso mi, ël Signor^[13]”. ²²A l’é për lòn che la glossolalìa^[14] a l’é n’indicassion segnalética^[15] nen për ij chërdent ma për coj ch’a chërdo nen. La profëssìa, a l’opòst, a l’é për coj ch’a chërdo, e nen për coj ch’a chërdo nen.

²³Combin che lolì a sìa parèj, imaginé che tuta vòstra comunità a sia radunà e che tuti a sio an camin ëd parlé 'd manera glossolàlica^[16], e ch’a-i intra cheidun ch’a l’é nen un chërdent o ch’a l’ha mai sentì 'd ròbe parèj: col-lì a podrìa bin pensé che la vòstra a sìa mach na gàbia 'd mat. ²⁴Ma se tuti a profetiso e ch’a-i intra cheidun ch’a l’é nen un chërdent o ch’a l’ha mai sentù ‘d ròbe parèj, tuti a-j faran vëdde ij sò pëccà e as sentirà sota 'l giudissi ëd Nosgnor. ²⁵A saran parèj dëscheuvert ij segret ëd sò cheur e për lòn a cascherà an ginojon^[17] e an adorand Nosgnor a proclamerà che për dabon Dé a sìa an tra 'd voi.

N’apel a 'd radunanse ordinà

²⁶Frej e seur, còsa ch’a l’é da fesse, antlora? Cand ch’i l’eve n’adunansa, che mincadun a-j contribuìssa con lòn ch’a l’ha an cheur: un salm, n’amaestrament, n’arvelassion, n’espression glossolàlica (che n’àutr peui a na daga l’interpretassion), ma che tut as fasa për l’edificassion. ²⁷S’a l’ha da fesse 'd glossolalìa, ch’a sio mach doi o al pì tre ch’a parlo, ma pa nen tuti ansema^[18], e ch’a na sia dàita l’interpretassion ëd lòn ch’a diso. ²⁸S’a-i é gnun ch’a peussa fé da antèrpret an cola riunion, a l’han da sté ciuto e ch’a parlo parèj a Nosgnor mach an privà.

²⁹Ch’a sìo mach doi o tre profeta a parlé, e che d’àutri a na dago la valutassion^[19] ëd lòn ch’a l’han dit. ³⁰Ma se cheidun a profetisa e n’àutra përson-a ch’a l’é astà, a 'rsèiv n’arvelassion da Nosgnor, ch’a chita ‘d parlé col che anans a parlava. ³¹Tuti a l’han ël drit ëd profetisé, ma mach l’un dòp l’àutr, përchè tuti a amprendo e a na sio consolà. ³²Arcordeve che coj ch’a profetiso a resto an contròl ëd sò spirit ëd lor e a peudo bin felo l’un dòp l’àutr^[20]. ³³Përchè Nosgnor a l’é pa nen un Dé 'd dzòrdin, ma 'd pas.

Coma ch’a l’é la costuma an tute le cese dël pòpol sant, ³⁴le fomne marià a l’han da stess-ne ciuto ant le adunanse dla cesa. A l’é nen bon-a creansa ch’a parlo. A l’han da mostré sotmission, coma ch’a dis fin-a la Lege. ³⁵S’a l’han cheicòsa da ciamé, ch’a la ciamo pì tard a sò marì a ca, përchè ch’a va nen bin che na fomna marià a parla ant j’adunanse dla cesa.

³⁶Gent ëd Corint! Penseve fòrsi che la paròla 'd Nosgnor a sia sortìa mach da vojàutri? O che mach vojàutri i sie coj ch’a l’han arseivùla? ³⁷Se cheidun a chërd d’esse 'n profeta o d’esse an comunion con lë Spìrit^[21], a dovrìa arconòsse che lòn ch’i vë scrivo a l’é 'n comandament ëd Nosgnor. ³⁸Se cheidun a preferiss d’ignorelo^[22] a l’avrìa chiel, pitòst, da esse ignorà!

³⁹Ëd conseguensa, mè frej e seur, ch’i l’abie n’anvìa ardenta 'd profetisé e proibisse nen la glossolalìa, ⁴⁰ma che tut as fasa con dignità e òrdin.

Nòte

1. O “ëd parlé sota l’ispirassion ëd Nosgnor”,“la professìa” (ἵνα προφητεύητε),  
2. O “ëd parlé ant na lenga spiritual” (λαλῶν γλώσσῃ). La glossolalìa ant ël cristianésim antich, a l’era ‘n carisma ch’a consistìa ant l’abilità ‘d preghé e ‘d laudé Nosgnor con un lengagi foravìa, strasordinari, privà, dësconossù a j’àutri, ch’a lo podìa comprende mach coj ch’a l’avìo ‘l don dl’anterpretassion, “ëd don dle lenghe”.
3. O “a edifica, a esòrta, a confòrta”.
4. O “la cesa”.
5. O “arpa”, “cétera”.
6. O “minca un-a a l’ha ‘d significà”
7. O “sapia dé l’interpretassion ëd lòn ch’a dis”.
8. O “l’inteligensa ch’i n’hai a l’é sensa frut”.
9. O “s’it làudes”.
10. O “rëspond-ne an disand ‘amen!’”.
11. O “ant la lege”.
12. O “an lenghe forestere”, “për boca ‘d foresté”. Cfr. Isaìa 28:11-12.
13. Lenghe misteriose ch’a sio nen interpretà a peudo nen dé ‘d benefissi, ch’a sio ëd chërdent o nò. La professìa (un messagi ch’as peul comprende) a l’é l’unica ch’a dìa ‘d benefissi a tuti.
14. O “le lenghe”.
15. O “un segn” (e fin-a a doe facie).
16. O “ch’a parlo an lenghe”.
17. O “as camperà giù con la front a tèra”.
18. O “mincadun a sò torn”.
19. O “ch’a faso ‘l disserniment”.
20. O “Ch’i sapie che j’ispirassion profètiche a l’han da sogetesse ai profeta”, o “jë spirit dij profeta a son sogetà ai profeta”.
21. O “spiritual”.
22. O “Se cheidun a l’arconòss nen”, “se cheidun a l’é ignorant”.