La Bibia piemontèisa/Testament Neuv/Corint/1Corint 12

←1 Corint 11

La Bibia piemontèisa Litre ai Corint

1 Corint 13→

La Bìbia piemontèisa - 1 Corint 12

1 Corint

12

Ij don dlë Spirit

¹Ora, car ij mè frej e seur, për lòn ch’a riguarda ij don ëspirituaj^[1], i veuj nen ch’i sìe ant l’ignoransa, ²Cand ch’ ancora i j’ere 'd pagan, i seve bin coma ch’iv fasìe antrené dëdsa e dëdlà da 'd divinità fàusse^[2] ch’a peudo nen parlé^[3]. ³Për lòn i veuj ch’i sapie ch’a-i é gnun ch’a disa 'd mal^[4] ëd Gesù ch’a peussa esse antrenà da lë Spìrit ëd Nosgnor^[5], coma ch’a-i é gnun ch’a disa “Gesù a l’é 'l Signor” ch’a sia nen për lë Spìrit Sant.

⁴Ora, a-i é vàire sòrt ëd don, ma lë Spìrit, ch’a-j dà, a l’é l’istess. ⁵A-i é vàire sort ëd servissi ch’as peulo rende, ma i servoma l’istess Signor. ⁶Nosgnor a travaja 'd manere diverse, ma col ch’a travaja an tuti noi a l’é l’istess Dé. ⁷Ij don che lë Spìrit a dà a ognidun, a son dàit pr’ ël benefissi dla comunità. ⁸A un lë Spìrit a dà la competensa^[6] 'd dé 'd consèj ëd saviëssa^[7]; a n’àutr ël medésim Ëspìrit a dà na conossensa foravìa^[8]. ⁹Grassie a col ùnich Ëspìrit un a l’arsèiv na fede granda e n’àutr ël don d’operé 'd varision, grassie a col ùnich Ëspìrit. ¹⁰A l’é chiel ch’a dà a un ël podèj ëd fé ‘d miracoj e a n’àutr ëd fé 'd professìe. A l’é chiel ch’a dà a un la competensa 'd disserne se 'n messagi a ven da lë Spìrit ëd Nosgnor o da n’àutr ëspìrit^[9] e a n’àutr ëd podèj parlé an d’àutre lenghe^[10], e a n’àutr ancora l’abilità d’antërpreteje. ¹¹Tut sòn a l’é l’euvra ‘d col ùnich e medésim Ëspìrit ch’a dëstribuiss tùit ës don. A l’é mach chiel ch’a decid che 'd don deje a na person-a^[11].

Un sol còrp e vàire mèmber

¹²Ël Crist a l’é tanme 'l còrp uman, ch’a l’é un, contut ch’a l’àbia vàire mèmber; tùit ij sò mèmber, bele ch’a sio tanti, a fan un sol còrp^[12]. ¹³An tra 'd nojàutri a-i é dij giudé e dij grech, dij s-ciav e dij lìber, ma tùit i soma stàit batesà ant un sol Ëspìrit për formé un còrp sol, e tùit i l’oma borasse d’un medésim Ëspirit.

¹⁴A l’é pròpi parèj: ël còrp a l’é fàit ëd vàire part diverse, nen mach ëd na part sola. ¹⁵Se 'l pé a disèissa: “Përchè ch’i son nen la man, i son nen dël còrp”, nen për lòn a chitrìa 'd fé part dël còrp. ¹⁶E se l’orija a disèissa: “Da già che mi i son nen n’euj, i son nen part dël còrp”, nen për lòn a chitrìa 'd fé part dël còrp. ¹⁷Se tut ël còrp a fussa n’euj, coma podrìo-ne sente? Se tut ël còrp a fussa n’orija, coma podrìo-ne nufié? ¹⁸Ma Nosgnor a l’ha dëstribuì ant ël còrp minca un dij mèmber ëd la manera che chiel a l’ha vorsù. ¹⁹Se tut ël còrp a l’avèissa mach un mèmber, còsa sarìa-lo dël còrp? ²⁰Parèj, donca, ij mèmber a son tanti, ma 'l còrp a l’é un. ²¹L’euj a podrìa mai dì a la man: “I sai nen còsa fene 'd ti!”, nì gnanca la testa ai pé: “I sai nen còsa fene ‘d vojàutri”. ²²Bin al contrari, ij mèmber dël còrp ch’a smijo ij pì deboj, a son motobin ij pì necessari. ²³Coj ch’a smija ch’a sio meno degn, i-j onoroma con pì d’atension; e le part ch’a son an noi le meno bele da vëdd-se a son le pì parà^[13]. A l’é parèj ch’i guernoma con atension cole part ch’as deuv nen vëdd-se, ²⁴mentre le part ch’a mérito pì d’onor a l’han nen da manca d’esse soagnà an cola manera. Nosgnor a l’ha rangià 'l còrp ëd tal manera ch’a l’ha dàit pì d’onor ai mèmber ch’a n’han meno da manca. ²⁵A l’é sòn ch’a stabiliss l’armonìa 'nt ël còrp, parèj che tùit ij mèmber a soagno j’un j’àutri. ²⁶Parèj, se na part a patiss, tute le part a patisso con chila, e se na part a l’é onorà, tute le part a s’arlegro con chila.

²⁷Bin, anlora, vojàutri i seve 'l còrp ëd Crist e ognidun a n’é un mèmber. ²⁸Vardé cole ch’a son cheidun-e dle part ëd la cesa: an prim leugh a-i é j’apòstoj, an ëscond leugh a-i é ij profeta, an ters leugh ij magister; dapress a-i é coj ch’a l’han ël podèj 'd fé 'd miracoj; peuj coj ch’a l’han ël don d’operé ‘d varision, coj ch’a peudo giuté j’àutri, coj ch’a l’han ël don ëd fé da guida, e coj ch’a peudo parlé an lenghe ch’as conòsso nen^[14]. ²⁹Tuti son-ne apòstoj? Tuti son-ne 'd profeta? Tuti son-ne ‘d magister? Tuti l’han-ne ‘l podèj ëd fé ‘d miracoj? ³⁰Tuti l’han-ne ‘l don 'd fé euvre ‘d varision? Tuti a parlo an lenghe ch’as conosso nen? L’é-lo che tuti a j’anterpreto? Sicur che 'd nò! ³¹Ora, susté ij don ch’a son ij pì ùtij, ch’a giuto da pì.

Adess i veui mostreve la manera ‘d vive ch’a l’é la mej ëd tute.

Nòte

1. O "don dlë Spirit", carisma.
2. O “idoj”.
3. O “mute”.
4. O “ch’a fasa ‘d maledission contra ‘d Gesù”.
5. O “ch’a parla për lë Spirit ëd Dé ch’a podrà mai dì che Gesù a sia d’arfudé”.
6. O “l’abilità”.
7. O “la paròla ‘d saviëssa”.
8. O “la paròla dla siensa”.
9. O “ël disserniment dij spirit”.
10. O “la varietà ‘d lenghe”.
11. 12:4-11 cfr. Roman 12:6-8.
12. Cfr. Roman 12:4-5.
13. O “soagnà”.
14. Cfr. Efesin 4:11.