Italo Cavalli/Sempre 'd coj ch'a mòlo nen

Artorn

---

Sempre 'd coj ch'a mòlo nen

Scoteme Piemontèis, drissé j'orije,
ancheuj për nòsta LENGA as da bataja,
tuti coi ch'a la màstio, òmo, fije,
ciòspo d'elitt ò gent ëd la maraja,
da ani j'é na Lege ch'an tucrija,
da l'EUROPA cantà ai ciòrgno 'd ROMA:
oh! LENGA PIEMONTEISA: sù ALEGRIJA!!
Costa sarà la vira ch'a-j la foma!!
A la Comun-a ëd Turin, ël meis d'avril,
fra propòste, mossion, un pò a sorprèisa,
dal Cap ëd la falangia, "coi dël Gril",
s-ciodoje un "SI" për - LENGA PIEMONTÈISA!!
Che ij - genit - Piemontèis as sio arvirasse?
"No sgnor". Al borgh dla - neuv - a l'han fait mej:
chi ch'a-i tenìa a la coltura, a l'é desviasse,
UNANIM a voté "SI" TUT SÒ CONSÈJ!!
A LA BONORA! I lo sognavo d'ampess!
Ch'as decidèisa caidun ëd fe domanda.
VIVA l'aprovassion! Bogiomse adess:
"DELIBERA L'È CARTA CH'A COMANDA!
Ël mur dl'indiferensa a l'é cherpasse,
la boria dij - sai tucc - a l'é sgonfià.
spantioma ben ël verb, për nòste piasse
prima che ij - savantin - arpio sò fià!
Nòsta bataja as bogia: prim atach;
j'é chi n'ostegia e chi ch'a në sosten.
Chi ch'a parla da òmo ò da vergnach...
A l'é, na stòria veja: TANT NOI MOLOMA NEN!!!