Giuseppe Mina/La piuma 'd mè cheur
An silensi modifiché
Ël vent dij sògn
a scriv, piuma lingera,
j’arcòrd lontan,
sn’armanach bianch, la vita,
pontin d’anciòstr,
che ’l temp, pian, a scancela.
Mace d’anciòstr,
sij feuj, la man a spantia,
rosse ’ma ’l feu,
stòrie d’amor mai finìe,
nèire, ’d carbon,
ringret, ombre perdùe.
Bleuve ’ma ’l mar,
abim d’onde profonde,
vërde, smerald,
òasi dla Speransa,
bianche ’ma ’l nen,
nìvole ch’a svanisso.