Giampiero Cavarero/Partigian

Partigian

(Sacrari ‘d San Bërnard ëd Bastia)

A i-e’ na cros an sla colin-a ,
che a guarda lontan , e la soa ombra
a vija ‘l suegn dij partigian…..

Na ciòca a biàuta pian pian ,possà dal vent,
ël batòcc a sfiora ‘l bronz,
e a manda un lament
che ,onda su onda a s’ëspatara sle tombe,
a cor tra le vis
e a va a meuire ant le combe!!!!

Le feuje dij roj,
cunà da l’ària marin-a,
a fan n’orassion ,con le fior dla colin-a,
ij passaròt giojos as fërmo un moment
a subiòto n’ave
e a vòlo via content!!!!!

Mila cros,scurpìe ant ël frèid dël marmo
a conto la stòria
‘d mila fieuj ch’a deurmo,
e mila cheur d’ëspose e ‘d mare strassià
a frissono a l’arcòrd ëd coj nòm ,
mai dësmentià !!!!!

Mila margherite ,fiorìe ant la tèra zerba,
a ricamo al crochèt
na cuverta gropà con ij fij d’erba,
pietos mantel ch’a stërma l’ësgiaj dla guèra
për fé smijé pi brava
nòstra pòvra tèra!!!

Ma, mila fior a son pa sbendìe ,
ant ël pra dla vita……..
a son restà an boton,
come na cita margherita…….

Fior ëd giovo che con soa vita
a l’han pagà
për col ideal ancreus,
che noi ciamoma………..liberta’ !!!!!!!!