Fabrizio Pignatelli/Compagne sensa nòm

Compagne sensa nòm…

Iv ricòrdo ancora bin - sloirassante sël pajon...
Ranché 'l fen an sij ghërpiass - pen-a 'l làit l’era sborgnà
tra le gnògnole dle rùmie - con ij gnèro a fé le vijà
Iv ricòrdo vache 'd Nòno - tërmolante 'nsima ij tron

Sij color ëd le pasture - tra motass e tersareuj
a flinghé mosche e tavan - sla canala dlë schinal
artërsé sota la pieuva - sota lun-e e sota gej
tiré 'l chèr drinta al gerbé - fin-a squasi a feve mal...

Iv risento vache 'd Nòno - fërloche-me ’d còse vere
Longh ël vieul ch’a va al gërpion - iv fermave a mangé more…
ma 'l vësson sgrinfand-ve j’ongie - a vë mnava ant la brujera
ciondojand ij vòst batòcc... - con n’arson, na meusia fera...

Fabrizio Pignatelli

Glossari

sloirassante = sdraiate nella stalla
ghërpiass = lunghe mangiatoie
sborgnà = appena munto
gnògnole = moine
gnèro = bambini
motass = zolla di terra
flinghé = percuotere (con la coda)
artërsé = arare la terza volta
gërpion = terra non ben coltivata
vësson = cane di campagna
sgrinfand-ve = prendervi ad unghiate sugli zoccoli
brujera = terreno incolto usato per il passaggio dei buoi
vòst batòcc = vostra campanella al collo
meusia fera = un lento rumore ed ondeggio, di campanelle..

Un fin arciarm a sotligné ël Sentiment antich, torment e passion pì ancarnìe. Nòno a-j vorìa na bin ëd l’ànima a ste bes-cie. Compagne sensa nòm…

(tratto da: Ànima Piemontèisa e cheur campagnin - Alzani - 2000)