Attilio Rossi/Tanti bocc ëd viòle

Tanti bocc ëd viòle

Vardand col’ùltima fiòca pen-a fondùa
arlongh al murèt ël prim bocc ëd viòle
a mosta soa bela fior ch’a l’é chërsùa:
mës-cià ai pì bej color ëd le parpajòle.
Peui ’nt l’àutr canton, un pòch pì ’n là
pròpi dacant al bel passage dël senté
da cola smens da l’ann prima spatarà
vëddo seurte bocc ëd viòle dël pensé.
Cole ’d montagna a vivo pòch pì ’n là
pròpi al pòst ëd la veja riva dël fossal
sò color a l’é ’n pò pì ciàir, a smija lilà:
con un pò d’ombra a vivo gnente mal.
Tacà a la stra ’n reul ëd viòle bianche
ch’a përfumo lë stradon macià ’d gris
a fiorisso soens e a son mai stanche:
a dan ël sens d’un canton ëd Paradis.
Sota a na gròssa magnòlia tuta fiorìa
a chërso j’àutri pensé, ciamà tricolor:
la gamba motobin fòrta ch’at fà anvìa
pòrta soa testa àuta, savend sò valor.
Dacant a jë scalin a chërsò cò ij violé:
na rama fòrta e giàune a son soe fior;
ma adess mi i seu pì nen còsa pensé
dnans a j’euj i l’heu mach ëd caplavor!
Fin-a adess ëd bele viòle i l’heu parlà
chërsùe ’nt ël mè giardin e ’nt ij senté,
ma adess che ’l tramont a l’é già calà
am lassa l’àutra Viòla ’nt ij mè pensé!

Prim premi al Concors «Renzo Pezzani» an Castion Turinèis (TO) 2018
Prim premi al Concors «Myo-sotis» an Rorà (TO) 2019
Premi «Magnificat» al Concors ëd Città Cologna Spiaggia (TE) 2018