Agostino Bosco/Centurie
da la "Prima centuria"
modifiché33
Spos Giangiaco, e vòstra ca?
Dapërtut dov'òm a stà.
Spos Giangiaco, e vòstra sala?
D'Istà l'àira, Invern la stala.
Spos Giangiaco, e la cusin-a?
Pan e aptit a disné e sin-a.
Spos Gianciaco, e vòstra tàura?
Sui ginoj com' i fas' àura.
Spos Giangiaco, e vòstr let?
Su la paja i deurm pì chiet.
Spos Giangiaco, e 'd guardaròba?
Tut adòss pòrt la mia ròba.
Spos Giangiaco, e la mobilia?
I mërdé dré 'd cola pilia.
Spos Gianciaco, e vòstra tèra?
Cola ch' sap fin ch' am sotèra.
Spos Giangiaco, e vòstr autin?
L'eva ciàira è mej dël vin.
Spos Giangiaco e vòstr giardin?
La campagna, e la mìa Margaritin.
34
Sposa Ghita, e vòstr còfo?
Su le spale a Sanchistòfo.
Sposa Ghita, e vòstr Vir d'òr?
Mè vir d'òr e 'l ver Amor.
Sposa ghita, e ij vòstr orcin?
Mè orcin l'é sentì bin.
Soosa ghita, e vòst bust?
L'é mè bust abèj bon sust.
Sposa ghita, e vòst anèl?
L'é mè anel esse fedel.
Sposa Ghita, e ij bej caussat?
Bej caussat son coj ch' son nat.
Sposa Ghita, e ij scarpin cit?
Mè scarpin è marcé drit.
Sposa ghita, e vòstra còta?
La modestìa e esse dvòta.
Sposa Ghita, e vòstra Dòta?
Li mè brass, e finimla ant una vòta.
da la "Centuria seconda"
modifiché32
Mè Msé l'era Msé Antòni,
Me pare Gianantòni,
Mi son Gustinantòni;
A l'é për lo, che fas nen àutr che 'd Tòni.
49
Luv ravas tut afamà
Scortia 'l pécure e j'agnej,
E 'nmantlà peu 'd coste pej
Predicand va Umanità.
52
Un Médich publichèr un Biat d'Invit
A tuti im Médich per na certa Festa
Ch'a volìa fé a soa ca:
Un Manëscard hadcò vojù 'ntré là,
Pensand d'incògnit dcò passé për Mèdich:
Ma da chial s'é dëscoert Falalirò,
Che 'ntrà, dlong ciama: Coma stalo 'l Bò?
67
Nasidien, oma sentì
Le lòdi 'd vòst Bujì,
Le lòdi 'd vòst Rustì,
Cole dla fricassà,
E cole dla Stufà,
Cole dij fricandò:
Adess përmëtve che na tasto dcò?
85
'L prim dì 'd Quarésima an Cesa an su n'Altar
Heu vist
un Crist
Casrià
'd ragnà;
Sùbit
Heu dit
A frà
Tomà,
Aussand un pò la vos:
E 's cheurbne già le Cros?
93
Un m'ha barbà la Cicia, e peu m'ha dit
Com'heu da fé con erba a formé 'l frit
E dòp ch' m'ha ciucià 'll Vin,
M'ha dit: l'Aqua l'é mej;
Heu fàit tut për vòst Bin. - Bin obligà
dla vòstra Umanità!
96
Un funs mach nà staneut
Vist una Rol 'd sent Ani e novanteut,
ch'i lo sorpassava tròp, e lo stërmava,
Dis al Pastor 'd na Crava:
Còs falo 's tronch? Pastor, o va tajà;
N'impacia mach,
L'é bon a nen,
Né vard né sach,
Cos élo ùtil për la società?
Tajà, serv a fé feu,
A fé bujì la Cicia e formé 'l Breu...
Fà Giand, fà Gala...
Ij Funs son mej, fradej, mèj ij Bolé,
Cos élo Gala e giand?
Così andé via cianciand, la rol è 'lvà:
Anlora 'l Sol d'Istà
Brusèr e Funs e Pra:
E crava e crin
Moriro 'd Fam, e adiù Tome e Bodin!